Бул тууралуу EurasiaPluse маалымат агенттиги билдирди.
Turmush — Каракол шаарына караштуу Пристань-Пржевальск аймагында Ысык-Көлдүн жаратылышын жана жээк тилкесин сактоо максатында көл жээкке кирүүчү 5 жерге тосмо орнотулду.
Каракол шаарындагы 9-чу муниципалдык аймактык башкармалыгынын башчысы Улан Байбосуновдун айтымында, унаалар көлгө чейин кирип кеткен учурлар болууда.
«Биздин максат — Ысык-Көлдүн жээгин унаалардан жана оор техникалардан коргоп, табигый экосистеманын сакталышына шарт түзүү. Тосмолор пляждарды эмес, негизинен унаалар менен уруксатсыз кирүүчү “жапайы” тилкелерди жабууга багытталган. Эс алуучулар унаалары менен келип, эс алып, таштанды таштап кетишет. Айрым учурда бул аймактарда унаалар көлгө чейин кирип жатышат. От жагып, кээде дөңгөлөктөрдү өрттөшкөн учурлар болот. Желим бөтөлкөлөр, желим баштыктар ташталат. Андыктан бул аймактарга унаалар гана кире албагыдай тосмолорду орнотууга аргасыз болуп жатабыз. Ал эми жөө адамдар үчүн тоскоолдук жок, жөө басып өтүп, эс алууга болот. Бардык эс алуучулардан көлгө аяр мамиле кылууга чакырабыз», – дейт ал.
Жабылган аймактар:
«Раксалад» дүкөнүнөн өткөндөгү аймак, Пристань СМУ «Пожарка» аймагынын эки жеринен, Пристань-Понтон аймагынан эки жерден (пляжка чейин ачык, андан кийин жабык).
Буга чейин Turmush басылмасы «Toyota Sequoia» үлгүсүндөгү унаанын айдоочусу Ысык-Көлдүн жээгине чейин айдап баргандыктан унаасы кумга тыгылып калганын жазган.
Ысык-Көл облустук ЖКККБнын басма сөз кызматы маалымдагандай, «Toyota Sequoia» үлгүсүндөгү автоунаа көл жээкке кирип, автоээнбаштык кылгандыгы жергиликтүү тургундар тарабынан видеотасмага түшүрүлүп, интернет булактарына тараган.
Тоң райондук жол кыймылынын коопсуздугун камсыздоо бөлүмчөсүнүн кызматкерлери тарабынан бул автоунааны табуу боюнча иш-чаралар жүргүзүлүп, натыйжада жогорудагы унаа табылган. Анын кыймыл аракетине Укук бузуулар жөнүндө кодексинин 189-беренесинин негизинде протокол түзүлүп, 15 миң сом өлчөмүндө айып пул салынып, автоунаасы айып короого токтотулду.
Укук бузуулар кодексинин 189-беренеси. Автоээнбаштык, башкача айтканда, транспорт каражатынын айдоочусунун коомду урматтабаганын ачык эле билдирген, жол кыймылынын эрежелерин жана транспорт каражатын пайдаланууну бузуу менен коштолгон (автомобиль жарышы, белгиленбеген жерлерде ар кандай түрдөгү көрсөтмөлүү айдоо ж.б.) коомдук тартипти жана жарандардын тынчтыгын ачыктан-ачык бузган атайын аракети — жеке жактарга 150 эсептик көрсөткүч өлчөмүндө (15 000) айып пул салууга алып келет.
Сүрөт: akipress.org сайтынан алынды