Бул тууралуу EurasiaPluse маалымат агенттиги билдирди.
АКИpress – Ысык-Көл облусунда «Тамчы» өзгөчө укуктук режими менен атайын инвестициялык аймакты түзүү сунушталууда. Тиешелүү мыйзам долбоорун Экономика жана коммерция министрлиги коомдук талкууга койду.
Долбоор президенттин 2025-жылдын 17-мартындагы № 92 «Ысык-Көл облусунун аймагында өзгөчө укуктук режими бар атайын инвестициялык аймакты жана англиялык укукту колдонгон талаштарды чечүү боюнча эл аралык борборду түзүү чаралары жөнүндө» жарлыгынын негизинде демилгеленди.
Министрлик ал Ысык-Көл облусунда жайгашып, туризм жана логистика багытында жогорку потенциалы бар аймак болорун белгилейт.
«Аймак өзгөчө укуктук режимге ээ болуп, ишкердик ишмердик үчүн жагымдуу шарттар түзүлөт. Бул режимге салыктык жана укуктук жеңилдиктер, мисалы, киреше жана мүлк салыгынан бошотуу, чет өлкөлүк кызматкерлер үчүн жеңил шарттар жана валюта операцияларынын эркиндиги кирет.
Анын негизги башкаруу органдары – башкаруу кеңеши, башкаруучу компания, каржы жөнгө салуучу, талаштарды чечүү боюнча эл аралык борбор жана каттоочу болот. Бул органдар өз алдынча иш алып барып, мыйзам долбоорунда каралган учурлардан тышкары мамлекетке көз каранды болбойт», – деп билдирет министрлик.
Долбоор көп тармакка пайда алып келери белгиленет.
«“Тамчы” экономикалык пайдадан тышкары инфраструктуранын өнүгүүсүнө – жолдор, энергетика, санариптик тармактар жана логистика – алып келет. Бул миңдеген жумуш орундарын түзүүгө, калктын кирешесин жана кесиптик деңгээлин жогорулатууга, технологияларды өнүктүрүүгө шарт түзөт.
Мындай моделдер дүйнөлүк тажрыйбада – Дубай эл аралык каржы борбору (DIFC) жана Астана эл аралык каржы борбору (AIFC) сыяктуу ийгиликтүү колдонулуп келет», – деп айтылат долбоордун маалым кат бөлүгүндө.
Сүрөт: akipress.org сайтынан алынды