Бул тууралуу EurasiaPluse маалымат агенттиги билдирди.
Turmush — 7-майда Жайыл районунун Орто-Суу айылында Улуу Ата Мекендик согуштун катышуучуларынын ысымдары чегилген мемориал ачылды. Бул тууралуу аймактык кабарчы билдирди.
Маалым болгондой, эстелик гранит плитасынан жасалып, ага Улуу Ата Мекендик согуш жылдарында фронтто болгон 200 айыл тургунунун — тылда эмгектенгендердин, ардагерлердин жесирлеринин жана согуш менен байланыштуу жергиликтүү тургундардын ысымдары чегилген.
Орто-Суу айылынын аксакалдар кеңешинин төрагасы Дүйшөнбек Жуматаевдин айтымында, Улуу Ата Мекендик согуш жылдарында Орто-Суу айылында 300 адам гана жашаган.
«Калинин аскер комиссариаты аркылуу 78 эркек фронтко чакырылган. Жоокерлерибиздин көпчүлүгү фронтто курман болгон, ал эми кайтып келгендеринин жаракаттары бар болчу. Маселен, атам Жуматай Буйлашев согуш учурунда оң бутунан жаракат алып, кийинчерээк ампутация болгон. Үйгө буту жок кайтып келген. Бирок эң негизгиси ал тирүү кайтып келди.
Бул эстеликке маалыматтарды чогултуу жарым жылга созулду. Биз жергиликтүү тургундардын арасынан Улуу Ата Мекендик согушка катышкан ардагерлердин, алардын аялдарынын, жесирлеринин, тылда кызмат кылгандардын маалыматтарын чогулттук. Андан кийин бул маалымат райондук Аскер комиссариаты жана айылдык кеңеш аркылуу бекитилди. Ынтымак айыл өкмөтүнүн жардамы менен биз бул мемориалды 7-майда салтанаттуу түрдө ачтык», – деди Д.Жуматаев.
2015-жылы Улуу Ата Мекендик согуштун 70 жылдыгына карата жергиликтүү тургундардын демилгеси менен айылдын борборуна эстелик тургузулуп, ал үчүн Кыргыз Республикасынын Коргоо министрлиги аркылуу эсептен чыгарылган БРДМ (бронированная разведывательно-дозорная машина) алынган.
Бүгүнкү күндө айылда миңге жакын тургун жашайт.
Сүрөт: akipress.org сайтынан алынды