Бул тууралуу EurasiaPluse маалымат агенттиги билдирди.
Turmush — Жалал-Абад облусунда быйылкы жылдын биринчи кварталында ымыркайлардын өлүмү азайган менен энелер өлүмүнүн көрсөткүчү кыскарган эмес. Мындай маалымат 2025-жылдын биринчи кварталы чыгарылган облустук жыйында айтылды.
Маалыматка караганда, дубанда 2025-жылдын 3 айында 5957 бала төрөлгөн. 1 жашка чейини 69 бала каза болуп, өткөн жылга салыштырмалуу 16га азайган. Ноокен, Тогуз-Торо райондорунда бирден эне каза болгон.
Саламаттыкты сактоо министрлигинин облустагы координатору Өмүрбек Маматжунус уулунун айтымында, кош бойлуулугу боюнча медиктердин көзөмөлүнө турган энелерди атайын WhatsApp группага кошуп, кош бойлуулуктун кооптуу белгилерине чейин маалыматтар бөлүшүлүп жатат.
Облуста 262 дарыгер жетишпейт. Дубан башчысы эне дарыгерлердин жетишсиздигин чечүү үчүн жергиликтүү бийликтин жасап жаткан кадамдарын сурады. Жыйында жаныдан ачылган Алийма Ташиева атындагы эне балдарды коргоо борборундагы кадр маселеси, дарыгерлерге түзүлүүчү шарттар боюнча маселе козголду. Андагы борбор ишин баштагандан бери 60 төрөт катталып, 5 операция жасалган. Нөөмөттөгү дарыгерлер жетиштүү. Дарыгерлер үчүн Сузак районунун борборунда салынган мамлекеттик ипотекалык компаниясы тарабынан салынган көп кабаттуу үйлөрдөн 25 батир кызматтык үй катары берилген. Бүгункү күнгө чейин жергиликтүү бийлик тарабынан 15 үйдүн эмеректери жасалып бүтөйүн деп калган.
2025-жылдын 30-январында ыйгарым укуктуу өкүлдүн иш-аракеттер планы бекитилип, анын алкагында мамлекеттик жана жергиликтүү органдар, мекеме-уюмдар жана ишкерлер менен биргеликте уюштуруу иштери жүргүзүлдү. Жалпылап айтканда, 2025-жылдын январь-март айларында Жалал-Абад облусунда 11 млрд 631 млн сомдук өнөр жай продукциясы өндүрүлгөн. Тоо кен, электр өндүрушүндө аткарылып жаткан кадамдар боюнча да маалымат окулду.
Президентти облустагы ыйгарым укуктуу өкүлү өзүнүн аппаратындагы баяндама жасаган кызматкерлерин жөн гана окубастан слайд менен баяндама жасоо керектигин эскертти. Ал жергиликтүү бийлик өкүлдөрү кызматтык этиканы сактабагандыктары үчүн ага даттануу көп келип жатканын айтты.
«Жарандардын кайрылууларына жооп бербей жатасыңар. Кайдыгерлик мамилеңерден улам силерге ишенбей бизге кайрылып жатышат. Кызматка келгенде жарандар көзгө көрүнбөй калбашы керек. Кызматтык этиканы сактагыла. Кийинкиде эч биринерди аябайм», – деди облус жетекчиси Т.Текебаев.
Сүрөт: akipress.org сайтынан алынды