Бул тууралуу EurasiaPluse маалымат агенттиги билдирди.
АКИpress – Социалдык тармакта жолдошунан үй-бүлөлүк зомбулук көргөндүгү тууралуу маалымат тараган аял менен акыйкатчы Жамиля Жаманбаева жолукту.
Акыйкатчы институнун басма сөз кызматы маалымдагандай, үй-бүлөлүк зомбулуктан жабыркаган 38 жаштагы аялдын иши жеке көзөмөлгө алынды. Жолугушууда жолдошунун зомбулугунан жабыркаган К.У. аттуу аял азыркыга чейин дарыланып жатканын, жакынкы күндөрү ага Улуттук госпиталдын жаак-бет хирургия бөлүмүндө кайра операция жасаларын билдирген.
Жабырлануучунун айтымында, окуя 2025-жылдын 7-мартынан 8-мартына караган түнү болгон. Жарандык никеде 3 жыл чогуу жашаган жигити чыр-чатак учурунда аны мыкаачылык менен сабаган.
«Эки күн үйдө жалгыз, жардамсыз жаттым. Көзүмдү ача албай калгам. Балдарым ошол күнү тайенесиникине кеткен болчу. Эки күндөн кийин курбума чалсам, ал тез жардам чакырып берди», – деген аял.
Улуттук госпиталдын ыкчам медициналык жардам бөлүмүнүн дарыгерлеринин маалыматына ылайык, ал ооруканага жеткирилген учурда баш мээси чайкалган, бетинде гематомалар жана жаракаттар болгон. Компьютердик томография жана рентгендин жыйынтыгында мурду, тиши жана бетинин сол тарабындагы сөөк 3 жерден сынганы аныкталган. Ошондой эле эки көзү жабыркаган.
Жабырлануучу жигитинин туугандарынын басымы менен Ленин райондук ички иштер бөлүмүнө жазган арызын кайтарып алганын айткан.
Ал 9 жана 7 жаштагы балдарын жалгыз багып келерин айтып, акыркы 2,5 айдан бери иштей албай, дарыланып жүргөнүн кошумчалаган.
Акыйкатчы жабыркаган аялга юридикалык кеңеш берип, анын укуктарын коргоодо жардам берүүгө даяр экенин билдирген. Аял кайрадан Ленин РИИБге арыз жазып, акыйкатчы Башкы прокуратурага кат жөнөтүп, кылмыш ишин объективдүү иликтөөнү көзөмөлгө алууну өтүнгөн.
Сүрөт: akipress.org сайтынан алынды