Бу ҳақда EurasiaPluse ахборот агентлиги хабар берди.
Дональд Трамп ва Урсула фон дер Ляйен 2020 йилда Давосдаги иқтисодий форумда. Архив сурат.
Фото: European Union
АҚШ Европа Иттифоқи товарларига 50 фоизлик божларни жорий этишни 9 июлгача кечиктиради, деди Дональд Трамп. Америка президентининг сўзларига кўра, у «яхши келишув» учун кўпроқ вақт сўраган Еврокомиссия раҳбари Урсула фон дер Ляйен билан суҳбатдан сўнг шундай қарорга келган.
АҚШ президенти Дональд Трамп Еврокомиссия раҳбари Урсула фон дер Ляйен билан суҳбатдан сўнг Европа Иттифоқидан импорт учун 50 фоизлик божлар жорий этилишини 9 июлгача кечиктиришини маълум қилди.
«Бугун менга Европа комиссияси раиси Урсула фон дер Ляйен қўнғироқ қилиб, 50 фоизлик тариф бўйича 1 июнга белгиланган муддатни узайтиришни сўради… 2025 йил 9 июлгача узайтиришга розилик билдирдим. Буни амалга ошириш мен учун шараф бўлди», — деб ёзди Трамп Truth Social ижтимоий тармоғида.
Фон дер Ляйен Х ижтимоий тармоғида ёзган постида Трамп билан «яхши» суҳбат ўтказганини таъкидлади.
«ЕИ ва АҚШ ўртасида дунёдаги энг муҳим ва яқин савдо алоқалари мавжуд. Европа музокараларни тез ва қатъий илгари суришга тайёр. Яхши келишувга эришиш учун бизга 9 июлгача вақт керак», — деди у.
Апрель ойи бошида Трамп АҚШ Вашингтоннинг иқтисодий манфаатларига путур етказаётган ўнлаб давлатлар учун ўрнатган «ўзаро тарифлар» доирасида Европа Иттифоқи товарларига 20 фоизлик божлар жорий этилишини эълон қилганди. Кейинчалик у музокаралар пайтида уларни 10 фоизга туширган.
Бироқ ўтган ҳафтада Трамп 1 июндан бошлаб ЕИ учун «тўғридан-тўғри 50 фоизлик тариф» жорий этишни таклиф қилди, чунки унинг сўзларига кўра, блок билан «муомала қилиш жуда қийин». «Бизнинг улар билан музокараларимиз ҳеч нарсага олиб бормайди!» — деб ёзди Трамп ўтган жума куни Truth Social`да.
Май ойида Bloomberg манбаларга таяниб, агар Вашингтон билан савдо музокаралари қониқарли натижага олиб келмаса, Европа Иттифоқи АҚШдан келадиган товарларга 100 миллиард евро (113 миллиард доллар) миқдорида қўшимча божлар жорий этишни режалаштираётгани ҳақида ёзганди. Агентликнинг қайд этишича, апрель ойида «жиддий» бошланган музокаралар сезиларли тараққиётга эришмаган ва Америка божларининг катта қисми ўз кучида қолиши кутилмоқда.
Фото: gazeta.uz сайтидан олинди