Бу ҳақда EurasiaPluse ахборот агентлиги хабар берди.
АҚШ президенти Дональд Трампнинг россиялик ҳамкасби Владимир Путин билан телефон орқали мулоқотидан кейинги баёноти Вашингтон Россия ва Украина ўртасида тинчликка эришишда воситачилик қилишдан воз кечиш ниятида эканини кўрсатади, деб ёзмоқда Ғарб ОАВ.
Трамп, хусусан, Россия ва Украина «зудлик билан» урушни тўхтатиш бўйича музокараларни бошлашини, шартлар эса «икки томон ўртасида муҳокама қилинишини», чунки «улар музокараларнинг бошқа ҳеч ким билмайдиган тафсилотларини билишини» айтди. Америка президентининг маълум қилишича, у қўнғироқдан кейин Украина президенти, Буюк Британия, Франция, Германия, Италия, Финляндия ва Европа комиссияси раҳбарлари билан суҳбатлашган.
Financial Times манбасининг сўзларига кўра, Европа раҳбарлари ва Владимир Зеленский АҚШ президенти Россия президенти билан келишиб олган нарсадан «ҳайратга тушган». Улар учун Трамп Путиннинг музокаралар столига жиддий ўтириши учун унга «кўпроқ босим ўтказишга тайёр эмаслиги» аниқ бўлди, деди газета суҳбатдоши.
Европанинг баъзи етакчилари Трамп билан суҳбат чоғида «ҳайратда» ва «шок»да кўрингани ҳақида Axios ҳам ёзди. Трамп уларга Путин зудлик билан ўт очишни тўхтатиш бўйича тўғридан-тўғри музокараларни бошлашга рози бўлганини айтганида, «бир неча сониялик ҳайратли сукунат чўкди», дейди нашр манбаси. Шундан сўнг Зеленский Путин аввалроқ музокараларга рози бўлганини эслатди, уларнинг биринчи раунди 16 май куни Истанбулда бўлиб ўтди. Трамп бунга тўғридан-тўғри жавоб бермади, деб хабар бермоқда Axios суҳбатдошлари.
Бундан ташқари, Трамп АҚШнинг Россияга қарши янги санкцияларига қарши эканини айтди ва, унинг фикрича, Путин келишув тузишни истаётганини таъкидлади, дея қўшимча қилади Axios.
Бундан 11 кун аввал Трамп Украинада 30 кунлик ўт очишни тўхтатишга чақириб, Россияга янги санкциялар қўллаш билан таҳдид қилганида Европа етакчиларининг руҳи кўтарилганди. Бироқ Трампнинг Путин билан телефон орқали мулоқоти бу умидлар пуч эканини кўрсатди, дея таъкидлайди Bloomberg.
Европа етакчилари суҳбат натижаларидан ҳафсаласи пир бўлганини билдирди: улар Трамп Украинани ва унинг иттифоқчиларини Россия билан ёлғиз қолдириб, урушни тўхтатиш бўйича саъй-ҳаракатларидан чекинишидан хавотирда, деб ёзади агентлик европалик амалдорга таяниб.
Bloomberg нашрининг яна бир суҳбатдошининг айтишича, Америка президенти янги санкциялар киритишни истамаслигини ва ўт очишни тўхтатиш таклифидан воз кечаётганини аниқ кўрсатган. Яна бир европалик амалдорнинг фикрича, Трамп шу тариқа Путинга вақтдан ютиш имконини бермоқда.
АҚШ президенти Россиядан зудлик билан ўт очишни тўхтатиш тўғрисида эълон қилиш талабини, шунингдек, Москвага босимни кучайтириш таҳдидларини рад этди, деб ёзади New York Times.
«Трамп, шунингдек, ўзининг воситачилик вазифасини олий кучга — папага — зўр иштиёқ билан топширганга ўхшайди», дея ёзади газета. Путин билан суҳбат якунлари бўйича постда Трамп Ватикан музокаралар ўтказишдан манфаатдор эканини ёзган.
Нашрнинг қайд этишича, Россия президенти билан суҳбатда сезиларли ютуқларнинг йўқлиги «Трампнинг шахсий харизмаси ва музокаралар олиб бориш маҳоратига бўлган ишончи чуқур келишмовчиликлар ва мураккаб сиёсий сабабларга дуч келганини» кўрсатади.
«Мана сизга Дональд Трампнинг Россия президенти Владимир Путинни Украинадаги урушга чек қўймоқчи эканини исботлашга мажбур қилаётган «шахсият кучи», — деб киноя билан ёзди CNN. Трамп Россия ва Украинанинг ўзлари тинчлик музокараларини олиб боришини айтиб, «Кремлдаги дўсти» тарафини олди, деб ҳисоблайди телеканал.
CNN, шунингдек, Трамп яна Украинадаги уруш харажатларидан шикоят қила бошлаганини таъкидлаб, АҚШ Киевга Жо Байден маъмурияти давридагидек ҳарбий ёрдам кўрсатмаслигини маълум қилди. Бу ёрдамсиз Украинанинг Россия босқинини қайтариш борасидаги саъй-ҳаракатлари жиддий чекланади, дея таъкидлайди телеканал.
Фото: gazeta.uz сайтидан олинди