Бу ҳақда EurasiaPluse ахборот агентлиги хабар берди.
Пойтахт Бухарест мэри, марказчи Никушор Дан Руминиядаги президентлик сайловларида 53,6 фоиз овоз (6,1 млн сайловчи) билан ғалаба қозонди. Унинг рақиби, «Руминия бирлашуви учун альянс» ультраўнг партияси етакчиси Жорже Симион 46,4 фоиз (5,3 млн) олди. Расмий маълумотлар Руминия сайлов комиссиясининг Prezenta.roaep.ro порталида эълон қилинди.
«Бу сизнинг ғалабангиз», — деди Дан ғалабадан кейин Бухарестдаги сайловолди штабида тарафдорларига. Симион эса ўз мағлубиятини тан олди: «Мен рақибим Никушор Данни табрикламоқчиман. У сайловда ғалаба қозонди. Руминия халқининг иродаси. Менга ишонч билдирган 5 миллиондан ортиқ руминияликларга миннатдорлик билдирмоқчиман».
Овоз беришнинг иккинчи босқичи 18 май куни бўлиб ўтди. Давомат 64% дан ошди — бу сўнгги 20 йилдаги энг юқори кўрсаткич. 4 май куни бўлиб ўтган биринчи турда Симион 41 фоиз, Дан эса 21 фоизни қўлга киритганди.
Аслида 2024 йил ноябрь ойи охирида Руминияда президентлик сайловининг биринчи тури ўтган ва ўта ўнг, ЕИ ва НАТОни танқид қилган мустақил номзод Кэлин Жеоржеску кутилмаганда етакчига айланганди. Иккинчи тур эса 8 декабрга белгиланганди.
Аммо 6 декабрда Руминия Конституциявий суди «жараённинг тўғрилиги ва қонунийлигини таъминлаш учун» президент сайловининг биринчи тур натижаларини бекор қилган. ОАВ Россия сайловга аралашгани ва биринчи тур ғолибининг тарғиботи учун кенг кўламли кампания ўтказганини ёзганди ўшанда.
Февраль ойида ўтган Мюнхен хавфсизлик конференциясида АҚШ вице-президенти Жей Ди Вэнс Европа сиёсатчиларини сўз эркинлигини бўғиб қўйгани учун танқид қилиб, Россия аралашуви туфайли Руминиядаги президентлик сайловларининг биринчи босқичи натижалари бекор қилинганини мисол қилиб келтирган.
«Сизнинг демократиянгизга бошқа мамлакатнинг бир неча юз минг долларлик рақамли рекламаси билан зиён етказиш мумкин бўлса, демак, у аввалида ҳам унчалик кучли бўлмаган», — деганди Вэнс.
Никушор Дан ҳақида нималар маълум?
55 ёшли Никушор Дан — Сорбонна университети битирувчиси, математик. Сиёсатга фуқаролик фаоллиги орқали кириб келган: Бухарестдаги тартибсиз қурилиш ва коррупцияга қарши курашда иштирок этган. «Руминияни қутқариш иттифоқи» партиясига асос солган, аммо кейинчалик мустақил номзод сифатида сайловда қатнашган. Уни босиқ ва тартибли сиёсатчи деб билишади. 2020 йилда у учинчи уринишда пойтахт ҳокими бўлган.
Дан Руминиянинг Европа Иттифоқи ва НАТОга интеграциялашувини қўллаб-қувватлайди, қонун устуворлиги ва суд тизимининг мустақиллигини таъкидлайди.
Бўлажак президент Украинани ҳарбий ва гуманитар қўллаб-қувватлаш тарафдори ва буни Руминиянинг Россия таҳдиди олдидаги ўз хавфсизлиги учун жуда муҳим деб ҳисоблайди.
Бош вазир номзодини илгари суриш ва парламентда барқарор кўпчиликни шакллантириш унинг биринчи галдаги вазифалари сирасига киради. Дан Европа Иттифоқидаги энг йирик бюджет тақчиллигини камайтиришга алоҳида эътибор қаратишни ваъда қилмоқда.
Иккинчи тур куни Telegram асосчиси Павел Дуров Франция ҳукуматини Руминиядаги сайловларга таъсир ўтказишга уринишда айблади. Унинг сўзларига кўра, улар Симионнинг таъсирини чеклаш учун руминиялик консерватив каналларни блоклашни сўраган.
«Мен буни қатъиян рад этдим. Telegram руминиялик фойдаланувчиларнинг эркинликларини чекламайди ва уларнинг сиёсий каналларини блокламайди. Демократияни йўқ қилиш билан „демократияни ҳимоя қилиб“ бўлмайди. Сайловга аралашиш билан „сайловга аралашишга қарши курашиб“ бўлмайди. Ё сизда сўз эркинлиги ва адолатли сайловлар бор ёки умуман йўқ. Руминия халқи ҳар иккаласига ҳам муносиб», — деди у. Франция ТИВ бу даъволарни сохта ва асоссиз деб атади.
Фото: gazeta.uz сайтидан олинди