Бу ҳақда EurasiaPluse ахборот агентлиги хабар берди.
Фото: «Spot.uz»
Рақобат қўмитаси Click компаниясини онлайн тўлов тизимлари бозорида устун мавқега эга деб топди.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси Click акциядорлик жамиятини онлайн тўлов тизимлари бозорида устун мавқега эга оператор сифатида эътироф этди.
Қўмита устун мавқеини суиистеъмол қилиш ҳолатларини олдини олиш мақсадида компанияда мажбурий тартибда Монополияга қарши комплаенс тизимини жорий этади ва тегишли тартибда мониторинг ўтказиб боради.
Маълумот учун, устун мавқе — бу товар ёки молия бозорида хўжалик юритувчи субъектнинг ёхуд шахслар гуруҳининг рақобатлашувчи хўжалик юритувчи субъектларга боғлиқ бўлмаган ҳолда унга ўз фаолиятини амалга ошириш ва рақобатнинг ҳолатига ҳал қилувчи таъсир кўрсатиш, тегишли бозорга бошқа хўжалик юритувчи субъектларнинг киришини қийинлаштириш ёхуд уларнинг иқтисодий фаолият эркинлигини бошқача тарзда чеклаш имкониятини берадиган ҳолат.
Агар компания ёки шахслар гуруҳининг бозор улуши 40 фоиз ёки ундан юқори бўлса, шунингдек, бошқа ҳолларда маҳсулот ёки молия бозоридаги устун мавқе тан олинади.
Аввалроқ онлайн тўлов тизимлари бозорида Payme ҳам устун мавқега эга деб топилганди.
Click ҳақида
Click бу — мобил телефон орқали уяли алоқа операторлари, интернет провайдерлар ва бошқа компанияларнинг хизматлари учун тўловларни амалга ошириш, анъанавий ва интернет дўконларда харидларга тўлаш, картадан картага маблағларни ўтказиш ва бошқа имкониятларни берадиган мобил банкинг тизими.
Компания 2011 йил ноябрь ойида ташкил этилган бўлиб, унинг асосчилари Улуғбек Рустамов, Рустам Файзиев ҳамда Баҳодир Абдукадиров ҳисобланади. Click Ўзбекистонда USSD орқали тўловларни биринчи бўлиб йўлга қўйган компаниялардан биридир.
Платформа фойдаланувчиларининг умумий сони 20 миллиондан ошган. 2025 йил апрель ҳолатига кўра, унинг устав капитали 10 млрд сўмни ташкил қилади.
Фото: gazeta.uz сайтидан олинди