Бу ҳақда EurasiaPluse ахборот агентлиги хабар берди.
Фото: Евгений Сорочин / «Газета.uz»
Қонунчилик палатаси депутатлари ЎзЛиДеП фракцияси ишлаб чиққан хусусий сектор ходимларини ишдан бўшатишни соддалаштиришга қаратилган қонун лойиҳасини рад этди. Қонунда ўриндошлик асосида ишловчи ходим билан меҳнат шартномаси бекор қилинганда компенсация тўлашни бекор қилиш таклиф этилганди.
Олий Мажлис Қонунчилик палатасининг навбатдаги мажлисида ЎзЛиДеП фракциясининг бир гуруҳ аъзолари томонидан ишлаб чиқилган «Ўзбекистон Республикасининг Меҳнат кодексига хусусий сектор учун белгиланган ижтимоий мажбуриятларни эркинлаштиришга қаратилган ўзгартириш ва қўшимчалар киритиш тўғрисида»ги қонун лойиҳаси биринчи ўқишда концептуал жиҳатдан кўриб чиқилди.
Лойиҳа тақдим этилар экан, амалдаги Меҳнат кодексида давлат ва хусусий секторда иш берувчилар учун бир хилдаги ижтимоий мажбуриятларнинг назарда тутилиши хусусий сектор, айниқса, кичик тадбиркорлик субъектларининг молиявий барқарорлигига сезиларли даражада таъсир кўрсатаётгани таъкидланди. Бу эса хусусий секторда ходимларни ишга қабул қилиш ва ишдан бўшатиш жараёнларининг расмий қайд этилмаслигига олиб келинаётгани айтилди.
Қонун лойиҳасида меҳнат шартномасини ходимнинг ташаббуси билан бекор қилишда аризани чақириб олиш жараёнида иш берувчининг иштирокини таъминлаш орқали томонларнинг масъулиятини ошириш, меҳнат шартномасини иш берувчи ташаббусига кўра бекор қилишда касаба уюшмаси қўмитаси ёки маҳаллий меҳнат органи билан келишиш жараёнларини соддалаштириш орқали хабардор қилиш тартибига ўтказиш кўзда тутилади.
Шунингдек, ходимнинг узоқ муддат меҳнатга қобилиятсиз бўлиши натижасида меҳнат шартномасини бекор қилиш асосларини такомиллаштириш ҳамда тадбиркорлик субъектларида ўриндошлик асосида фаолият юритаётган ходим билан меҳнат шартномаси бекор қилинганда огоҳлантириш муддати ва компенсация тўловларини бекор қилиш белгиланган.
Мажлисда «Ўзбекистон Республикасининг Меҳнат кодексига хусусий сектор учун белгиланган ижтимоий мажбуриятларни эркинлаштиришга қаратилган ўзгартириш ва қўшимчалар киритиш тўғрисида»ги қонун лойиҳаси қизғин муҳокамаларга, баҳс ва тортишувларга сабаб бўлди.
Қонун лойиҳасини ёқлаб фақат ЎзЛиДеП депутатлари овоз берди, қолган партияларнинг деярли барча депутати қизил тугмани босди. Қонун ташаббускорларга қайтарилди.
Фото: gazeta.uz сайтидан олинди