Бу ҳақда EurasiaPluse ахборот агентлиги хабар берди.
Фото: Шоҳруҳ Ҳайдаров / «Газета.uz»
Ўзбекистонда шаҳарлараро ҳаракатланувчи, жумладан, Тошкент — Хўжакент каби поездларга чиптани онлайн харид қилиш имкони яратилди. Билетлар elektropoyezd.uz сайтида фақат жорий кун учун сотилади. Уларни сақлаб қўйиш ва поезд кузатувчисига кўрсатиш зарур.
Ўзбекистонда шаҳарлар атрофида ҳаракатланадиган поездларга чипталарни онлайн олиш имкони яратилди, дея хабар берди «Ўзтемирйўлйўловчи» компанияси матбуот хизмати.
Электрон чиптани elektropoyezd.uz платформаси орқали харид қилиш мумкин. Бунинг учун мазкур сайтдан рўйхатдан ўтиш керак бўлади.
Компания матбуот котиби Алишер Балтабаевнинг «Газета.uz»га аниқлик киритишича, ҳозирда шаҳар атрофи (пригород) қатновларида чипталар фақат жорий кун учун сотилади.
«Чипта харид қилингач, сизга электрон чиптада сана ва вақт маълумотлари аниқ кўрсатилади. Бундай қатновларда ўринлар сони ҳисобга олинмайди ва умумий вагон тизимида амалга оширилади. Агар сиз чипта сотиб олган бўлиб, поездингиз тўлиб қолган бўлса, шу куннинг давомида кейинги шунга ўхшаш поездга ўша чипта билан чиқишингиз мумкин», — дея тушунтирди «Ўзтемирйўлйўловчи» вакили.
Компания электрон чиптани сақлаб қўйиш ва поезд кузатувчисига уни электрон кўринишда тақдим этиш кераклигини эслатди.
Қуйидаги видеода уни қандай сотиб олиш ҳамда рўйҳатдан ўтиш тартиби кўрсатилган:
Фото: gazeta.uz сайтидан олинди