Европа Иттифоқи Россияга қарши санкцияларнинг 17-пакетини маъқуллади – Газета.uz

Европа Иттифоқи Украинадаги ҳаракатлар учун Россияга нисбатан жорий этилган 17-санкциялар пакетини, жумладан, 200 га яқин соядаги флот кемаларига қарши чораларни расман маъқуллади. Бу ҳақда 20 май куни ЕИнинг ташқи ишлар ва хавфсизлик сиёсати бўйича олий вакили Кая Каллас маълум қилди.

«Янги чоралар гибрид таҳдидлар ва инсон ҳуқуқларига ҳам таъсир кўрсатади. Россияга нисбатан янги чекловлар ишлаб чиқилмоқда. Россия урушни қанча узоқ давом эттирса, бизнинг жавобимиз шунчалик қаттиқ бўлади», — деб таъкидлади Каллас.

Пакет ўтган ҳафта Европа Иттифоқи элчилари томонидан қўллаб-қувватланган эди, аммо шундан сўнг у заиф ва кучсизлантирилган деб танқид қилинган, , деб ёзади Kyiv Independent.

Янги санкциялар Кремлга аллақачон киритилган чоралардан қочишга ёрдам беришда айбланаётган Россиянинг ҳарбий ва сиёсий элитаси аъзолари ҳамда Хитой ва Бирлашган Араб Амирликларидаги хорижий тузилмаларга ҳам қарши қаратилган.

Европа Иттифоқи дезинформация тарқатган 20 дан ортиқ субъект ва шахсларга, шунингдек, Россия мухолифати, хусусан, Владимир Кара-Мурза ва марҳум Алексей Навалнийга қарши суд ишларида иштирок этган 20 нафар судья ва прокурорга ҳам санкциялар қўллайди.

Бундан ташқари, у Россия мудофаа саноати учун муҳим бўлган таркибий қисмларга, яъни кимёвий моддалар, материаллар ва икки мақсадли товарларга қаратилган.

Европа Иттифоқи Россияга агар президент Владимир Путин ўт очишни тўхтатиш мажбуриятини олмаса ва тинчлик саъй-ҳаракатлари билан жиддий шуғулланишга рози бўлмаса, қўшимча санкциялар билан таҳдид қилди.

• Европа Иттифоқи кенгаши февраль ойи охирида Россияга қарши санкцияларнинг 16-пакетини маъқуллаганди. Унга, хусусан, Россиянинг 8 та ОАВсини блоклаш, РФ минтақавий банкларини SWIFT `дан узиш ва индивидуал санкциялар киритилган. Шунингдек, 50 дан ортиқ ташкилот, жумладан, Ўзбекистон компанияси чекловлар остида қолганди.