Бу ҳақда EurasiaPluse ахборот агентлиги хабар берди.
Фото: Шуҳрат Латипов / «Газета.uz»
«Адолат» партияси депутати Гулнора Абдувоҳидова хусусий клиникаларда ўлим билан боғлиқ ҳолатлар кўпайиб бораётгани юзасидан соғлиқни сақлаш вазири Асилбек Ҳудаяровга депутатлик сўрови юборди.
Олий Мажлис Қонунчилик палатасидаги «Адолат» СДП фракцияси аъзоси, депутат Гулнора Абдувоҳидова хусусий тиббиёт муассасаларида нотўғри тиббий муолажалар оқибатида фуқаролар саломатлигига жиддий зарар етиши ва ҳатто ўлим билан якунланаётган ҳолатлар кўпайиб бораётгани юзасидан Ўзбекистон соғлиқни сақлаш вазири Асилбек Худаяровга депутатлик сўрови юборди. Бу ҳақда партия матбуот хизмати хабар берди.
Депутат ўз сўровида айрим хусусий тиббиёт муассасаларида шифокорларнинг нотўғри ташхиси ёки муолажаси сабабли фуқароларнинг вафот этиши, ногирон бўлиб қолиши каби ҳолатлар сони ортиб бораётгани жамоатчиликда хавотир уйғотаётганини таъкидлаган.
Сўровда келтирилган маълумотларга кўра, тиббиёт ходимларининг касб юзасидан ўз вазифаларини лозим даражада бажармаслиги билан боғлиқ жиноятлар бўйича чиқарилган ҳукмлар сони йилдан йилга ошиб бормоқда (2023 йилда — 67 нафар, 2024 йилда — 94 нафар, 2025 йилнинг биринчи чорагида — 16 нафар).
Абдувоҳидова яқинда ижтимоий тармоқларда кенг муҳокамаларга сабаб бўлган Фарғона ва Бухородаги хусусий клиникаларда рўй берган ўлим ҳолатлари, шунингдек, нотўғри пластик жарроҳлик оқибатида ёш блогернинг соғлиғига жиддий путур етгани каби воқеаларни мисол қилиб, бундай салбий тенденциянинг сабабларини ўрганиш ва унга чек қўйиш заруратини таъкидлайди.
Депутатлик сўровида Соғлиқни сақлаш вазирлиги олдига қуйидаги саволлар қўйилган:
- Хусусий тиббиёт муассасаларида ушбу нохуш ҳолатлар кўпайишининг асл сабаблари нимада ва уларнинг олдини олиш бўйича вазирлик томонидан қандай чоралар кўрилмоқда?
- Хусусий клиникаларда рўй берган ҳар бир инсон ўлими, ногиронлик ёки соғлиққа жиддий зарар етказиш ҳолати вазирлик томонидан таҳлил қилинганми ва уларнинг такрорланмаслиги учун қандай амалий ишлар қилинган?
- Хусусий тиббиёт муассасаларида муолажаларнинг тўғри қўлланилиши ва тасдиқланган тиббий протоколларга амал қилиниши устидан тизимли назорат механизми мавжудми? Бу борада қандай аниқ чора-тадбирлар амалга оширилмоқда?
- Вазирлик аҳоли саломатлигини ишончли ҳимоя қилиш мақсадида хусусий клиникалар учун лицензия талаблари ва шартларини қатъийлаштириш бўйича қандай таклиф ва ташаббусларни илгари суришни режалаштирмоқда?
Депутат Абдувоҳидова «Парламент назорати тўғрисида»ги Ўзбекистон қонунининг 15-моддасига мувофиқ, Соғлиқни сақлаш вазиридан юқоридаги саволларга 10 кун муддат ичида асослантирилган жавоб беришни сўраган.
Фото: gazeta.uz сайтидан олинди