Ҳиндистон ва Покистон бир-бирига зарбалар йўллади. Ҳалок бўлганлар бор

7 майга ўтар кечаси Кашмирнинг Покистондаги қисмида кўплаб портлашлар содир бўлди. Шундан сўнг Ҳиндистон ҳукумати Покистондаги, шунингдек, Кашмирнинг Покистон қисмидаги «террорчилик» инфратузилмасига ҳужум бошлаганини эълон қилди.

Ҳиндистон ҳукумати «Синдур операцияси» доирасида тўққизта объектга ҳужум қилганини билдирди.

Покистон Мудофаа вазирлиги Ҳиндистон мамлакат ҳудудидаги объектларга ракета ҳужуми уюштирганини тасдиқлади. Покистон давлат телевидениеси армия маълумотларига кўра, Ҳиндистон Покистоннинг учта ҳудудига зарба берганини маълум қилган, деб ёзади AFP.

https://twitter.com/AdityaRajKaul/status/1919852833815384408

Уларга кўра, портлашлар Покистоннинг Озод Жамму ва Кашмир ҳудуди маъмурий маркази Музаффаробод шаҳри атрофидаги тоғлар яқинида маҳаллий вақт билан ярим тундан кейин содир бўлган. Портлашлардан сўнг шаҳарда электр таъминоти узилган.

Ўз навбатида, Покистон ҳарбий-ҳаво кучлари ва армияси Ҳиндистонга жавоб зарбалари йўллади.

Покистон томонидан учта ҳинд самолёти ва битта ҳинд дрони уриб туширилди. Покистон Ҳиндистон тажовузига муносиб жавоб қайтарди, деб ёзди мамлакат ахборот вазири Аттауллаҳ Тарар.

Geo Tv суҳбатдошининг сўзларига кўра, Покистон қуролли кучлари ҳаводан ҳам, ердан ҳам жавоб зарбалари берган. Мудофаа вазири Хаважа Асиф Ҳиндистонни ҳужум учун қоралаб, унинг ҳаракатларини қўрқоқлик деб атади.

Ҳиндистон армияси «Покистон ўт очишни тўхтатиш тўғрисидаги келишувни яна бузганини» маълум қилди. Ҳиндистон томонининг хабарида айтилишича, қуролли кучлар «тегишли тарзда жавоб бермоқда».

Ҳиндистон ҳужуми оқибатида Покистоннинг бешта аҳоли пункти зарар кўрди, деб хабар берди Покистон бош вазири Шаҳбоз Шариф. У Покистон томони жавоб зарбалари бераётганини тасдиқлади. Бош вазир ҳужумни «уруш ҳаракати» деб атади.

CBC News нашрининг Покистон армиясига таяниб ёзишича, Ҳиндистон ҳужумлари оқибатида камида саккиз киши ҳалок бўлди ва 35 киши яраланди.

Покистоннинг Панжоб вилоятида фавқулодда ҳолат эълон қилинди, деб ёзди Reuters нашри мухбири маҳаллий ҳукуматга таяниб.

Шунингдек, Покистон ҳукумати Ҳиндистоннинг мамлакат ҳудудига берган зарбаларидан сўнг икки кунга ҳаво ҳудудини ёпди.

Мамлакатнинг барча аэропортларида, жумладан, Карачи, Лаҳор, Файсалобод, Сиалкотда барча ички ва халқаро рейслар бекор қилинди. Исломобод халқаро аэропорти ҳам барча рейслар учун ёпилди, рейслар Карачи аэропортига йўналтирилмоқда.

Pakistan International Airlines авиакомпанияси яқин 12 соат ичида барча рейсларни бекор қилишини маълум қилди. Покистон фуқаро авиацияси бошқармаси хавфсизлик соҳасидаги вазият барқарорлашганда авиаташувчиларнинг иши нормал жадвалга қайтишини билдирди.

Покистон Ҳиндистон учта нишонга ракета билан зарба берганини айтди, ҳарбий вакилнинг Reuters агентлигига айтишича, унинг мамлакати Ҳиндистоннинг бешта самолётини уриб туширган, бу даъво Ҳиндистон томонидан тасдиқланмаган.

БМТ бош котиби Антониу Гутерриш «дунё Ҳиндистон ва Покистон ўртасида ҳарбий қарама-қаршиликни кўтара олмаслигини» айтди. АҚШ президенти Дональд Трамп эса икки давлат ўртасидаги зиддиятнинг кескинлашувини «шармандалик» деб атади ва ҳаммаси «жуда тез тугашига» умид билдирди.

Сўнгги ҳафталарда Ҳиндистон ва Покистон муносабатлари 22 апрель куни Ҳиндистон назоратидаги Жамму ва Кашмир ҳудудида жойлашган Паҳалгам шаҳри яқинида қуролланган одамлар бир гуруҳ сайёҳларга қарата ўт очганидан кейин кескинлашди. Ўшанда 26 киши ҳалок бўлганди.