Бу ҳақда EurasiaPluse ахборот агентлиги хабар берди.
Канада бош вазири Марк Карни парламент сайловларида ғалаба қозонганидан кейин илк бор Оқ уйда АҚШ президенти Дональд Трамп билан учрашди. Учрашув мамлакатлар ўртасидаги савдо уруши ва Трампнинг Канада АҚШнинг 51-штати бўлиши кераклиги ҳақидаги баёнотлари фонида бўлиб ўтди.
New York Times`нинг ёзишича, Карни Овал кабинетга келишидан олдин «шернинг инига» кетаётгандек туйилган, бироқ Канада бош вазири у ерда «уй мушуги»га рўбарў келган. «Канада мен учун жуда ўзига хос жой. Мен Канадада яшайдиган жуда кўп одамларни биламан… Мен Канадани яхши кўраман», — деди АҚШ президенти учрашув аввалида.
Трампнинг оҳанги Truth Social ижтимоий тармоғидаги постида канадаликлар АҚШсиз яшай олмаслигини ёзиб, Карни Оқ уйга келишидан бир неча дақиқа олдин эълон қилганидан анча фарқ қилди, дея таъкидлайди NYT. Газетанинг ёзишича, Трамп «ўз хатти-ҳаракатларининг оқибатлари билан юзма-юз келган ва улар билан шуғулланишни унчалик хоҳламайдиган одамга ўхшарди».
CBC News`нинг ёзишича, Канада расмийлари Карни ва Трампнинг учрашуви февраль ойи охирида АҚШ президенти ва Украина етакчиси Владимир Зеленский ўртасидаги учрашувда бўлгани каби «хаосга айланиши» сценарийсидан қўрққан. «Биз бошқа бириси билан озгина тортишиб қолгандик», — деб ҳазиллашди Трамп. «Ўшанда вазият бутунлай бошқача эди. Ҳозир эса жуда дўстона суҳбатлашяпмиз».
Журналистларнинг у Канаданинг АҚШга қўшилишига жиддий қарайдими, деган саволига Трамп ҳа, деб жавоб берди, бироқ бунинг амалга ошиши даргумонлигини тан олди.
«Танго учун икки киши керак» деган Трамп шундай қўшимча қилди: «Қалбан қурувчи бўлганим учун АҚШнинг Мексика кўрфази қирғоқларидан то Қутб доирасигача чўзилишини истар эдим».
«Мен ҳақиқатан ҳам Канада учун бу анча яхши деб ўйлайман», деди у ва бу ҳолда канадаликлар камроқ солиқлар ва кучлироқ мудофаага эга бўлишини айтди.
Канада бош вазири бунга жавобан дипломатик тарзда Трамп бизнесдаги тажрибасидан «ҳеч қачон сотилмайдиган жойлар борлигини» билишини айтди, деб ёзади CBC News.
«Мен сўнгги ойларда сайловолди кампанияси давомида Канада эгалари [сайловчилар] билан учрашдим ва шуни айтишим мумкинки, у сотилмайди ва ҳеч қачон сотилмайди», — деди Карни.
«Ҳеч қачон ҳеч қачон дема», — деб жавоб берди Трамп.
«Ҳеч қачон, ҳеч қачон, ҳеч қачон, ҳеч қачон, ҳеч қачон», — деди кулиб Карни.
«Канаданинг позицияси ҳеч қачон ўзгармайди», — дея кейинроқ яна бир бор таъкидлади Канада бош вазири.
Трамп божлар ҳақида гапирар экан, қўшни давлат учун божларни бекор қилишга тайёр эмаслигини айтди. Нима учун, деган саволга АҚШ президенти «шундай бўлиб қолди», деб жавоб берди.
Карни, ўз навбатида, божлар USMCA (АҚШ, Канада ва Мексика ўртасидаги савдо келишуви)ни бузишини айтди, аммо ундаги баъзи нарсаларни ўзгартириш кераклигини тан олди.
Трамп USMCA келишувини яхши деб атади ва уни қайта кўриб чиқишга тайёрлигини билдирди, бироқ унга «нозик ўзгартиришлар» киритиш кераклигини таъкидлади.
«Биз баъзи нозик ўзгаришлар устида ишламоқчимиз, эҳтимол», — деди Трамп ва ҳозирда томонларнинг аниқ таклифлари йўқлигини тан олди. «Ҳозир биз кўпроқ концепциялар билан шуғулланяпмиз».
Фото: gazeta.uz сайтидан олинди