МИБ ходимлари ундирилган қарзлардан бонус олади

Ўзбекистонда давлат ижро органлари ходимлари ва Мажбурий ижро бюроси ходимларини ижро йиғимлари ҳисобидан моддий рағбатлантириш тартиби тасдиқланди. Бу бош прокурорнинг 14 майдаги буйруғида кўзда тутилган.

Ижро йиғими суд ижрочиси суд қарорлари ва бошқа органларнинг қарорларини ижро этиш бўйича ҳаракатларни амалга оширишда оладиган ундиришлар. Йиғим қарздордан ижро варақасини ихтиёрий равишда ижро этиш муддати ўтганидан кейин қуйидаги миқдорда ундирилади:

• мулкий характердаги ижро ҳужжатлари учун — жисмоний шахсдан ундирилган сумманинг 1 фоизи миқдорида, юридик шахсдан 2 фоизи миқдорида;
• номулкий ижро ҳужжатлари учун — жисмоний шахсдан меҳнатга ҳақ тўлашнинг энг кам миқдорининг 5 баравари, юридик шахсдан эса 10 баравари миқдорида.

Моддий рағбатлантириш харажатлари Мажбурий ижро бюросини ривожлантириш жамғармасига ижро йиғимлари маблағларининг 10 фоизини ушлаб қолиш ҳисобига қопланади. Тўловлар суммалари Ижро ҳужжатларининг ягона электрон маълумотлар базаси маълумотлари асосида ҳар ойнинг охирида автоматик тарзда ҳисоблаб чиқилади.

Бюро марказий аппаратининг тўғридан-тўғри йиғим ундирувчи ходимлари 80 фоиз, лекин МҲТЭКМнинг 3 бараваридан кўп бўлмаган (3,47 миллион сўм) миқдорда устама олиши мумкин бўлади. Бошқа давлат хизматчилари учун ҳам худди шундай чеклов билан 20% бонус назарда тутилган. Ҳудудий бўлинмаларда шартлар ўхшаш.

Туман ва шаҳар бўлимларида бевосита ижро хизматлари учун йиғим ундирувчи ходимлар топшириқда кўрсатилган сумманинг 80 фоизини (бошқа ижрочилар — 20 фоиз), лекин МҲТЭКМнинг 4 бараваридан кўп бўлмаган миқдорда (4,62 миллион сўм) олишлари мумкин бўлади.

Мулкий хусусиятга эга бўлмаган ҳужжатлар бўйича ундирилган ижро йиғимининг бир қисми тўлиқ ҳажмда (лекин МҲТЭКМнинг 4 бараваридан кўп бўлмаган) давлат ижрочисига юборилади.

Давлат ижроия органлари ходимларига ундириш қисман ёки соддалаштирилган тартибда амалга оширилган ҳолатлар учун мукофотлар берилмайди. Шунингдек, ижроси тўхтатилган ёки кейинга сурилган, шунингдек, бошқа ҳудудга юборилган ва ижросиз қайтарилган ҳолатлар ҳам қамраб олинмайди.

Агар ходим тизимга нотўғри маълумотлар киритган бўлса ёки бир ойдан ортиқ вақт давомида ўзининг асосий вазифаларини бажармаган бўлса (ўқиш, туғуруқ таътиллари, касаллик ва бошқалар) тўловлар амалга оширилмайди.