Миллий брендларни қўллаб-қувватлаш компанияси ташкил қилинади

Ўзбекистонда Миллий брендларни қўллаб-қувватлаш компанияси ташкил қилинади. Бу ҳақда 26 май кунги маҳаллий саноатни ривожлантириш бўйича видеоселектор йиғилишида президент Шавкат Мирзиёев маълум қилди.

Йиғилишда 2025 йилнинг биринчи 4 ойида экспорт 20 фоизга ошгани, юқори ўсиш суръатлари асосан кимё, озиқ-овқат, мева-сабзавот, IT, туризм ва транспорт хизматлари ҳисобидан таъминланаётгани айтилди. Лекин тўқимачилик экспорти 825 млн доллар, яъни ўтган йилгидан 175 млн долларга камроқ бўлган.

«Кўпчилик сифатга ишлаётгани билан буни кўрсатиб бера олмаяпти. Биздаги маҳсулотларнинг „номи чиқмагани“ учун ташқарида жуда арзон сотилаяпти. Маҳсулот сифатини кўрсатиб, уни қиммат бозорларга олиб чиқадиган энг асосий калит, бу — халқаро сертификатлар», — деди президент.

Ҳозирда тўқимачилик соҳасидаги 1,5 мингдан зиёд йирик ва ўрта корхонадан фақат 244 тасида халқаро сертификат мавжуд. Шавкат Мирзиёев Савдо-саноат палатаси ҳар бир корхонага бориб, сертификат олишга кўмаклашса, қўшилган қийматни ҳам, экспортни ҳам ошириш мумкинлиги таъкидлади.

Президент Қорақалпоғистон, Қашқадарё, Навоий, Сирдарё, Сурхондарё, Хоразм вилоятларида халқаро сертификатга эга корхоналарни 20 тага етказиш, қолган ҳудудларда яна 10 тадан корхонага сертификат олишга кўмаклашиш вазифасини қўйди.

Давлат раҳбари миллий брендларни кўпайтириш, мавжудларини халқаро даражага олиб чиқиш бўйича ҳам янги тизим жорий қилинишини айтди.

Унга кўра, мамлакатда Миллий брендларни қўллаб-қувватлаш компанияси ташкил қилинади. Ушбу компания:

• хориждан бренд-менежер, дизайнер, маркетолог, пиар-менежерларни олиб келади;
• халқаро сертификати бор, сифати юқори ва ташқи бозорда рақобатбардош бўлган камида 50 та миллий маҳсулотни танлаб олади;
• уларга сифат белгисини бериб, брендини дунёга танитиш учун катта тарғибот кампаниясини бошлайди.

Эслатиб ўтамиз, 2024 йилнинг март ойида Ўзбекистонда Савдони ривожлантириш компанияси ташкил этилганди. У, жумладан, чет элдан малакали дизайнер, технолог ва маркетологларни жалб этиб, миллий маҳсулотларни халқаро талабларга мослаштириш, экспортчиларнинг янги бозорларга чиқишига кўмаклашиш, миллий брендларни хорижда тарғиб қилиш билан шуғулланиши таъкидланганди.