Москва ва Москва вилоятидаги хорижликлар илова орқали назорат қилинади

Россия Давлат думаси депутатлари 20 май куни иккинчи ва учинчи ўқишда Москва ва Москва вилоятида чет эл фуқароларини махсус мобил илова ёрдамида, шу жумладан, мобил қурилмаларнинг геолокациясини кузатиш орқали қўшимча назорат қилиш ва ҳисобга олиш бўйича экспериментни жорий этиш тўғрисидаги қонунни қабул қилди.

«Ведомости» нашрининг ёзишича, қонун вояга етмаганлар, дипломатлар ва уларнинг оила аъзолари, шунингдек, Беларус ьфуқароларидан ташқари барча хорижликларга таъсир қилади.

Пилот лойиҳа тўрт йилга мўлжалланган бўлиб, 2025 йил 1 сентябрдан 2029 йил 1 сентябргача давом этади. «Агар тажриба муваффақиятли ўтса, уни бошқа ҳудудларга ҳам тарқатиш мумкин бўлади», — деб ёзди қуйи палата раиси Вячеслав Володин.

Чет элликлар махсус мобил иловада рўйхатдан ўтишлари, шунингдек, шахсий маълумотларни, жумладан, мобил қурилмалар маълумотлари ва геолокацияни қайта ишлашга розилик беришлари керак бўлади. Бундан ташқари, чет эл фуқаролари Ички ишлар вазирлигининг ҳудудий органларига ўзларининг ҳақиқий жойлашуви тўғрисида маълумот беришлари шарт. Агар турган жойида ўзгариш бўлса, бу ҳақда илова орқали уч иш куни ичида хабар бериш керак бўлади. Истиснолар чет эллик меҳмонхонада, санаторийда, касалхонада, колонияда, қамоқхонада ва ҳоказоларда бўлган ҳолатларда амал қилади.

Чет эл фуқароси, агар унинг геолокацияси тўғрисидаги маълумотлар охирги мониторинг санасидан бошлаб уч иш кунидан ортиқ муддатда келиб тушмаса, тажриба ўтказилмайдиган минтақада миграция рўйхатидан ўтган бўлса ёки у Россиядан кетган ёхуд вафот этган бўлса, ҳисобдан чиқарилади.

Эксперимент 18 ёшга тўлмаган чет элликларга, Беларусь фуқароларига, хорижий давлатларнинг Россиядаги дипломатик ваколатхоналари ва консуллик муассасалари раҳбарлари ва ходимларига, шунингдек, уларнинг оила аъзоларига, халқаро ташкилотлар мансабдор шахсларига, дипломатик ва хизмат паспортлари эгаларига таъсир қилмайди.

2025 йил 10 март куни қуйи палатага киритилган қонун лойиҳаси бошқача мазмунга эга эди. У Молия вазирлиги томонидан ишлаб чиқилган бўлиб, меҳнат мигрантларига бир вақтнинг ўзида иккита ҳудудда битта патент бўйича ишлашга рухсат беришни таклиф қилган. Масалан, агар Москва ва Москва вилоятининг (ва шунга ўхшаш Санкт-Петербург ва Ленинград вилоятининг) юқори мансабдор шахслари ўзаро махсус шартнома тузса, чет элликлар бир вақтнинг ўзида ҳам пойтахтда, ҳам Москва вилоятида битта патент бўйича ишлашлари мумкин бўлади.

Шу тариқа, депутатлар қонун лойиҳасини 14 май куни биринчи ўқишда қабул қилди. Дума томонидан қабул қилинган якуний версияда «Россия Федерациясидаги чет эл фуқароларининг ҳуқуқий ҳолати тўғрисида»ги қонунга киритилган ушбу ўзгартиришлар ҳам сақланиб қолди.

Эслатиб ўтамиз, Россияга кираётган чет эл фуқаролари 30 июндан «Госуслуги RuID» иловаси орқали QR код олишлари керак бўлади. Буни 3 суткадан кечиктирмай, фавқулодда ҳолатларда эса келишдан камида 4 соат олдин амалга ошириш зарур.