Бу ҳақда EurasiaPluse ахборот агентлиги хабар берди.
Фото: Бош прокуратура
Москвада Ўзбекистон ва Россия вакиллари ўртасида мигрантлар ҳуқуқларини ҳимоя қилиш масалалари бўйича идоралараро ишчи гуруҳнинг йиғилиши бўлди. Прокуратуралар ушбу мамлакатларда икки давлат фуқароларининг ҳуқуқларига риоя этилиши устидан назорат ва кузатувни кучайтириш мажбуриятини олди.
2025 йилнинг 28−29 апрель кунлари Москва шаҳрида бўлиб ўтган меҳнат миграцияси ва мигрантлар ҳуқуқларини ҳимоя қилиш масалалари бўйича Ўзбекистон-Россия идоралараро ишчи гуруҳининг биринчи йиғилиши бўлиб ўтди, дея хабар қилди Бош прокуратура матбуот хизмати.
Унда Ўзбекитсон бош прокурори ўринбосари Шоҳруҳ Аминов раҳбарлигидаги вазирлик ва идоралар делегацияси иштирок этди. Россия делегацияси таркибига Россия бош прокурори ўринбосари П.Городов раҳбарлигида Бош прокуратура, Федерал хавфсизлик хизмати, Ташқи ишлар, Ички ишлар вазирликлари ва бошқа идоралар вакиллари киритилган.
Қайд этилишича, тадбир давомида томонлар миграция соҳасидаги амалдаги ҳолат, муаммоли жиҳатлар ва уларни ҳал этиш йўлларини муҳокама қилдилар. Йиғилиш иштирокчилари икки давлат манфаатларини ҳисобга олган ҳолда миграция соҳасида қонунийликни таъминлашга қаратилган ҳамкорликдаги чора-тадбирларни ишлаб чиқишга келишиб олдилар.
Икки давлат Бош прокуратуралари Ўзбекистон фуқароларининг Россияга меҳнат фаолиятини амалга ошириш мақсадида келиши ҳамда Россия фуқароларининг Ўзбекистонга келишлари жараёнида уларнинг ҳуқуқларга риоя этилиши устидан назорат ва кузатувни кучайтириш мажбуриятини олдилар.
Тадбир якунида делегациялар раҳбарлари меҳнат миграцияси ва мигрантлар ҳуқуқларини ҳимоя қилиш масалалари бўйича Ўзбекистон-Россия идоралараро ишчи гуруҳининг биринчи мажлисида қабул қилинган қарорлар акс этган баённомани имзоладилар.
Имзоланган баённома ижроси Ўзбекистон ва Россия Бош прокуратуралари томонидан алоҳида назоратга олинади, дейилади хабарда.
Фото: gazeta.uz сайтидан олинди