Бу ҳақда EurasiaPluse ахборот агентлиги хабар берди.
Фото: Ватикан
Рим папаси Лео XIV Россия ва Украина ўртасидаги урушни тугатишга уриниш учун Ватиканда музокараларнинг навбатдаги раундини ўтказишга тайёр, деб маълум қилди Италия бош вазири Жоржа Мелони. Папа илк нутқидаёқ дунёда, жумладан, Украинада тинчлик ўрнатишга чақирганди.
Рим папаси Лео XIV Россия ва Украина ўртасидаги музокараларнинг навбатдаги босқичини Ватиканда ўтказишга тайёрлигини билдирди. Бу ҳақда Италия бош вазири Жоржа Мелони маълум қилди, деб ёзмоқда Reuters.
Унинг сўзларига кўра, 20 май куни у понтифик билан телефон орқали мулоқот қилган. Мелони Лео XIV га «тинчликка содиқлиги учун чуқур миннатдорлик» изҳор этган.
Иккинчи, алоҳида баёнотида, Италия бош вазири кейинги қадамлар бўйича Европанинг бошқа етакчилари ва Украина президенти Владимир Зеленский билан ҳам музокаралар ўтказганини айтди.
«Украинада ўт очишни тўхтатиш ва тинчлик битимига эришишга қаратилган музокараларнинг янги раундини кўзлаб, ҳамкорлар ўртасида яқин мувофиқлашувни сақлаб қолишга келишиб олинди», — дейилади баёнотда.
Аввалроқ Рим папаси Ватиканни Россия ва Украина ўртасида музокаралар ўтказиш жойи сифатида таклиф қилган эди. Шу билан бирга, у музокараларда воситачи бўлишга тайёр эмаслигини таъкидлаганди.
19 май куни АҚШ президенти Дональд Трамп Владимир Путин билан телефон орқали мулоқотидан сўнг, понтифик музокаралар ўтказишдан манфаатдор эканини маълум қилганини алоҳида таъкидлади. «Трамп, шунингдек, ўзининг воситачилик вазифасини олий кучга — папага — зўр иштиёқ билан топширганга ўхшайди», дея ёзди New York Times.
Лео XIV ни 8 май куни Римнинг янги папаси этиб сайланди. Якшанба кунги биринчи нутқида у Украинада тинчлик ўрнатишга чақирганди: «Мен қалбимда севимли украин халқининг азоб-уқубатларини олиб юрибман. Иложи борича тезроқ ҳақиқий, адолатли ва мустаҳкам тинчликка эришиш учун барча имкониятлар ишга солинсин», — деганди у.
Фото: gazeta.uz сайтидан олинди