Шавкат Мирзиёев Москвада Ғалабанинг 80 йиллигига бағишланган тадбирларда қатнашди (фото)

Бу ҳақда EurasiaPluse ахборот агентлиги хабар берди.

Шавкат Мирзиёев 9 май куни Москвада Иккинчи жаҳон урушидаги Ғалабанинг 80 йиллигига бағишланган тантанали тадбирларда иштирок этди, деб хабар бермоқда Ўзбекистон президенти матбуот хизмати.

Қизил майдонда Ғалаба паради бўлиб ўтди. Тадбирда Хитой раиси Си Цзиньпин, Бразилия президенти Лула да Силва, Миср президенти Абдулфаттоҳ ас-Сиси, Беларусь президенти Александр Лукашенко, Қозоғистон президенти Қосим-Жомарт Тоқаев, Қирғизистон президенти Садир Жапаров, Тожикистон президенти Эмомали Раҳмон, Туркманистон президенти Сердар Бердимуҳамедов, Мўғулистон президенти Ухнаагийн Хурэлсух, Куба президенти Мигель Диас-Канель, Венесуэла президенти Николас Мадуро ва бошқалар қатнашди.

Ғалаба паради якунида Шавкат Мирзиёев Россия президенти Владимир Путин ва бошқа давлат раҳбарлари билан биргаликда Александр боғидаги Номаълум аскар қабрига гул қўйди. Маросим бир дақиқалик сукут ҳамда фахрий қоровул ва ҳарбий оркестрнинг тантанали юриши билан якунланди.

Эслатиб ўтамиз, Ўзбекистон раҳбари 2023 ва 2024 йилларда 1941−1945 йиллардаги урушда қозонилган Ғалабанинг нишонланиши муносабати билан ўтказилган тантанали тадбирларда ҳам қатнашган.

Статистика

Уруш бошланган пайтда Ўзбекистон аҳолиси 6 миллион нафардан зиёд бўлган. Уруш йилларида икки миллионга яқин ўзбекистонлик фронтга жўнатилган. 538 мингдан зиёд киши жанг майдонларида ҳалок бўлган, 158 мингдан ортиғи бедарак йўқолган.

Ўзбекистондан 214 мингдан зиёд аскар ва офицер жанговар орден ва медаллар билан тақдирланган. Ватандошлардан 301 киши Совет Иттифоқи Қаҳрамони унвонини олган, 70 киши «Шуҳрат» орденининг барча даражалари соҳиби бўлган.

Ўзбекистон фронтолди ҳудудларидан эвакуация қилинган 1,5 миллиондан ортиқ кишини, жумладан, 250 мингдан зиёд етим болаларни қабул қилган.