Бу ҳақда EurasiaPluse ахборот агентлиги хабар берди.
Фото: IRNA
Ўзбекистон президенти Бандар Аббосдаги портлаш муносабати билан Эрон президентига ҳамдардлик йўллади. Портлаш оқибатида 25 киши ҳалок бўлган, 1139 киши жароҳатланган, 6 киши бедарак йўқолган.
Шавкат Мирзиёев Эроннинг Бандар-Аббос шаҳридаги Шаҳид Ражоий порти ҳудудида рўй берган портлаш оқибатида кўплаб инсонлар ҳалок бўлгани ва жиддий жароҳат олгани, катта талафотлар кўрилгани муносабати билан президент Масъуд Пезешкиёнга таъзия мактуби йўллади. Бу ҳақда президент матбуот хизмати хабар қилди.
Давлат раҳбари вафот этганларнинг яқинларига сабр-тоқат ва бардамлик, жароҳат олганлар тез фурсатда шифо топишини тилади.
IRNA маълумотига кўра, 26 апрель куни содир бўлган портлаш оқибатида 25 киши ҳалок бўлган, 1139 киши жароҳатланган, 6 киши бедарак йўқолган. Хурмозган вилоятида уч кунлик мотам эълон қилинди.
Шаҳид Ражоий порти Эроннинг энг йирик контейнер порти бўлиб, у ерда мамлакатдаги барча контейнерларнинг деярли 80 фоизи тўғри келади.
Дастлабки маълумотларга кўра, портлашга нотўғри сақланган кимёвий моддалар, хусусан, ракета ёқилғиси ишлаб чиқаришда ишлатиладиган натрий перхлорати сабаб бўлган.
Портлаш оқибатида юзага келган тўлқин бир неча километр масофадаги биноларнинг ойналарини синдирди ва яқин атрофдаги иншоотларга зарар етказди. Портлаш овози Қешм оролида, яъни 26 километр узоқликда ҳам эшитилган.
Эрон президенти Масъуд Пезешкиён ҳодиса юзасидан зудлик билан тергов ўтказишни буюрди.
Фото: gazeta.uz сайтидан олинди