Соғлиқни сақлаш вазирининг икки ўринбосари ишдан олинди, яна бири огоҳлантирилди

Йўл қўйилган камчилик ва хатолар учун соғлиқни сақлаш вазирининг ўринбосарлари Даврон Султанов, Фаррух Шарипов лавозимидан озод этилди. Бу ҳақда президент 7 май куни ўтказган йиғилишда маълум қилинди.

Мазкур тадбирда давлат раҳбари соғлиқни сақлаш вазири ўринбосари Олим Омоновни 6 ойда рақамлаштиришда ўзгариш қилмаса, ишдан олиниши ҳақида огоҳлантирди.

Олим Омонов.

Прездиент матбуот хизматининг хабарига кўра, Шавкат Мирзиёев тиббий суғуртани жорий қилиш сурункали сурилиб келаётгани кескин танқид қилган.

Тошкент шаҳрида 2024 йили, Қорақалпоғистон, Навоий, Самарқанд, Фарғона, Сурхондарё ва Хоразмда бу йили ушбу тизим ишга тушиши керак эди. Суғурта жамғармаси фақат тайёр пулни тақсимловчига айланиб қолган.

«Белгиланган ислоҳотларимиз қанчалик тўғри бўлмасин, тизим рақамлашмаса, кутилган натижага эриша олмаймиз», — деди президент.

Лекин мутасаддилар тизимни тўлиқ рақамлаштириш у ерда турсин, оддий «электрон рецепт»ни ҳам ишга тушира олмаган. «Электрон поликлиника», «Электрон шифохона»ни жорий этишда ҳам жиддий оқсоқликлар бор.

«Вазирлик раҳбарлари дунёқарашини ўзгартириб, фидойи бўлмаса, масъулиятни ҳис қилиб, сўровни кучайтирмаса, ислоҳотлар маҳаллагача етиб бормайди», — деди давлат раҳбари.

Давлат тиббий суғуртасини жорий этиш бир неча бор режалаштирилган. Мазкур режалар дастлаб президентнинг 2017 йил апрелида қабул қилинган Соғлиқни сақлашда хусусий секторни ривожлантириш тўғрисидаги қарорида тилга олинган эди.Тошкентда уни босқичма-босқич амалга ошириш 2023 йил ўрнига 2024 йилнинг бошига ўтди, кейинроқ бошқа ҳудудларда ҳам кўчирилди. Президент қарорида Ўзбекистонда тиббий суғуртани жорий этишни якунлаш муддати 2026 йил охирилиги белгиланган.

Эслатиб ўтамиз, соғлиқни сақлаш вазирининг биринчи ўринбосари Алишер Шадманов узоқ муддатли даволаниш учун меҳнат таътилига чиққани сабабли 2024 йил 9 январдан унинг вазифаси Даврон Султановга юклатилганди. Фаррух Шарипов ва Олим Омонов президент қарори билан 2023 йил 12 сентябрида ҳозирги лавозимига тайинланганди.