Бу ҳақда EurasiaPluse ахборот агентлиги хабар берди.
АҚШ ҳукумати, агар компания мамлакат ташқарисида iPhone ишлаб чиқаришни тўхтатмаса, Apple`га камида 25 фоиз миқдорида бож жорий қилади, деди Америка президенти Дональд Трамп.
«Мен Apple`дан Тим Кукка уларнинг iPhone`лари Ҳиндистон ёки бошқа жойда эмас, балки АҚШда ишлаб чиқарилиши ва йиғилишини кутаётганимни аллақачон айтганман», — деб ёзди Трамп Truth Social ижтимоий тармоғида. Агар бу содир бўлмаса, Apple АҚШ ҳукуматига «камида 25 фоиз» миқдорида бож тўлайди, дея қўшимча қилди у.
Трампнинг таҳдидларидан сўнг Apple акциялари АҚШдаги дастлабки савдоларда 3 фоиздан кўпроққа арзонлашди.
Ўтган ҳафта Яқин Шарққа қилган сафари давомида Трамп Apple компаниясининг бош директори Тим Кукнинг АҚШда сотилиши кўзда тутилган iPhone`ларни Ҳиндистондаги янги заводларда ишлаб чиқариш режаларига норозилик билдирган эди, деб ёзади CNN.
«Менда Тим Кук билан кичик муаммо пайдо бўлди. Мен унга шундай дедим: „Тим, сен менинг дўстимсан. Мен сенга жуда яхши муносабатда бўлдим. Сиз 500 миллиард доллар сармоя киритмоқчисиз“. Лекин энди эшитишимча, сен бутун Ҳиндистон бўйлаб [заводлар] қуряпсан. Ҳиндистонда қурилиш қилишингни истамайман», — деди Трамп Қатарга ташрифи чоғида.
CNN`нинг таъкидлашича, сўнгги бир неча йил ичида Apple ишлаб чиқариш жараёнини диверсификация қилиш устида ишлаган. iPhone ишлаб чиқаришнинг бир қисми аллақачон Хитойдан Ҳиндистонга кўчирилган. Кук, шунингдек, май ойи бошида сармоядорлар билан бўлган мулоқотда «АҚШда сотиладиган iPhone`ларнинг аксарияти Ҳиндистондан келиб чиқишини» кутаётганини айтган.
Reuters нашрининг манбаларга таяниб хабар беришича, Apple 2026 йил охиригача АҚШда сотиладиган iPhone`ларнинг аксариятини ишлаб чиқаришни Ҳиндистонга кўчирмоқчи. Компания ўзининг асосий ишлаб чиқариш базаси — АҚШ ва Хитой ўртасида давом этаётган савдо уруши фонида ўз режаларини тезлаштирмоқчи. Трамп томонидан Пекинга қарши жорий этилган юқори божлар Apple`да таъминот занжири бузилишидан хавотир уйғотди, бу эса iPhone нархларининг ошишига олиб келиши мумкин.
CNN билан суҳбатлашган экспертларнинг фикрича, АҚШда ишлаб чиқарилган iPhone`лар ҳозирги нархидан уч баравар қимматроқ бўлиши мумкин (тахминан 1000 доллар), чунки компания ҳозир Осиёда мавжуд бўлган ўта мураккаб ишлаб чиқариш экотизимини қуриши керак бўлади. Ҳатто шундай бўлган тақдирда ҳам, Apple ўз ишлаб чиқаришининг камида 10 фоизини АҚШга кўчириши учун тахминан 30 миллиард доллар ва уч йил керак бўлади.
Фото: gazeta.uz сайтидан олинди