Бу ҳақда EurasiaPluse ахборот агентлиги хабар берди.
АҚШ президенти Дональд Трамп Россия президенти билан телефон суҳбатидан сўнг Европа етакчиларига Владимир Путин «Украинадаги урушни тугатишга тайёр эмаслигини, чунки у ўзини ғолиб деб билишини» айтди, деб ёзмоқда Wall Street Journal манбаларга таяниб.
Европа етакчилари ҳам Путин урушни тўхтатмоқчи эмас, деб ҳисоблаган, бироқ буни биринчи марта Трампдан эшитишган, дея таъкидлайди WSJ. Бу Трампнинг Путин чин дилдан тинчлик истайди, деган оммавий риторикасига зиддир, деб ёзади нашр. Шунга қарамай, Америка президенти ҳамон Кремлга босимни кучайтиришга тайёр эмас.
Трамп Путин билан суҳбатдан бир кун олдин Россия президенти ўт очишни тўхтатишдан бош тортса, АҚШ санкциялар киритиши мумкинлигини айтганди. Бироқ қўнғироқдан сўнг у ўз позициясини ўзгартирди, деб ёзади WSJ.
Бунинг ўрнига, WSJ маълумотларига кўра, Трамп Россия ва Украина ўртасидаги қуйи даражадаги музокараларни Ватиканда давом эттиришни хоҳлаётганини айтган. Трамп иттифоқчиларига у ерга АҚШ давлат котиби Марко Рубио ва президентнинг махсус вакили Кит Келлоггни юборишини маълум қилган. Ватикандаги музокаралар июнь ойи ўрталарида бўлиб ўтиши мумкин.
Трамп Россияга қарши санкциялар қўллашдан бош тортганига қарамай, суҳбат Европа етакчиларига ўз позициясини мустаҳкамлашга ёрдам берди: Путин урушни бу босқичда тугатмоқчи эмас, деб ёзади нашр. Европа давлатлари ҳам Трамп маъмурияти Америка қуролларини етказиб беришни тўхтатишига ишонмаяпти, чунки Европа ёки Украина бунинг учун пул тўламоқда.
Трамп ва Путин 19 май куни телефон орқали Украинадаги урушни муҳокама қилди. Суҳбат якунида Трамп Москва ва Киев «зудлик билан» урушни тўхтатиш бўйича музокараларни бошлашини, шартлар эса «икки томон ўртасида муҳокама қилинишини» айтди. Путин, ўз навбатида, Россия Украина билан келажакдаги тинчлик шартномаси бўйича меморандум устида ишлашга тайёрлигини билдирди.
Европа етакчилари ва Украина раҳбари Путин билан суҳбатдан кейин Трампнинг баёнотидан «шокда қолди». Ғарб матбуотига кўра, Трампнинг сўзлари АҚШ Киевни Москва билан ёлғиз қолдириб, воситачилик ролидан воз кечмоқчилигини кўрсатмоқда.
Фото: gazeta.uz сайтидан олинди