Бу ҳақда EurasiaPluse ахборот агентлиги хабар берди.
Фото: White House / Daniel Torok
АҚШ президенти Дональд Трамп хорижий фильмларга 100 фоизли бож жорий этмоқчилиги ҳақида ёзди. У бу чора Америка кино саноатини қўллаб-қувватлашга ёрдам беришини таъкидлади.
АҚШ президенти Дональд Трамп хорижий фильмларга 100 фоизли бож жорий этиш режалари ҳақида эълон қилди. У бу ҳақда ўзининг Truth Social ижтимоий тармоғидаги саҳифасида ёзди.
Унинг айтишича, бошқа давлатлар Америка киноижодкорлари ва студияларининг мамлакат ташқарисида ишлашини таъминлаш учун қўлидан келган барча ишни қилмоқда. Айни пайтда эса АҚШ кино саноати «тезлик билан ўлиб бормоқда». «Биз фильмлар яна Америкада суратга олинишини истаймиз», — деди АҚШ президенти.
The New York Times’нинг ёзишича, Трампнинг ижтимоий тармоқлардаги бошқа баёнотларида бўлгани каби бу сафар ҳам у нима ҳақида гапираётгани тўлиқ тушунарли эмас.
«У ҳар қандай фильм, жумладан, артхаус театрлари учун мўлжалланган чет тилидаги фильмлар ва фақат стриминг хизматларида мавжуд бўлган фильмларни ҳам назарда тутяптими? Бундай тариф фақат хорижий давлатлардан солиқ имтиёзлари олган фильмларга тааллуқли бўладими ёки чет элда суратга олинган саҳналари мавжуд исталган фильмга нисбатан қўлланиладими? Постпрадакшн жараёнидаги визуал эффектлар чет элда яратилган бўлсачи? Битта супер қаҳрамон ҳақидаги фильм кўпинча бутун дунё бўйлаб жойлашган 50 ёки ундан ортиқ ихтисослашган компанияларнинг ўзаро ҳамкорлигида яратилади-ку», — дея қайд этган нашр.
Фото: gazeta.uz сайтидан олинди