Трамп ва Путин телефон орқали Украинадаги урушни муҳокама қилди – Газета.uz

АҚШ президенти Дональд Трамп 19 май куни Россия президенти Владимир Путин билан телефон орқали мулоқот қилиб, Украинадаги урушни ҳал қилиш масаласини муҳокама қилди. Суҳбат икки соатдан ортиқ давом этди.

Путиннинг баёнотидаги асосий жиҳатлар:

• Суҳбат «жуда мазмунли ва жуда самимий» бўлди.
• Россия Украина инқирозини тинч йўл билан ҳал қилиш тарафдори. «Биз шунчаки тинчлик сари ҳаракатланишнинг энг самарали йўлларини аниқлашимиз керак».
• «АҚШ президенти билан Россия Украина томони билан келгусида мумкин бўлган тинчлик шартномаси бўйича келишув тамойиллари, мумкин бўлган тинчлик шартномасини тузиш муддатлари ва бошқалар, шу жумладан, тегишли келишувларга эришилган тақдирда маълум муддатга ўт очишни тўхтатиш каби бир қатор позицияларни белгилаган ҳолда меморандум тузишни таклиф қилиши ва ишлашга тайёрлиги тўғрисида келишиб олдик».
• «Истанбулдаги учрашув ва музокаралар иштирокчилари ўртасидаги алоқалар қайта тикланди ва бу биз, умуман олганда, тўғри йўлда эканимизга асос бўлади».
• «Россия ва Украина томонлари тинчликка максимал даражада интилишлари ва барча томонлар рози бўладиган муросаларни топишлари керак… Умуман олганда, Россиянинг позицияси аниқ. Биз учун асосийси — бу инқирознинг асл сабабларини бартараф этиш».

Трампнинг баёнотидаги асосий жиҳатлар:

• Менимча, [суҳбат] жуда яхши ўтди».
• «Россия ва Украина зудлик билан ўт очишни тўхтатиш ва, энг муҳими, урушни ТЎХТАТИШ бўйича музокараларни бошлайди. Бунинг шартлари икки томон ўртасида муҳокама қилинади, чунки улар бошқа ҳеч ким билмайдиган музокара тафсилотларини билишади».
• «Россия Қўшма Штатлар билан бу ҳалокатли „қон ҳаммоми“ тугагач, кенг кўламли САВДО қилишни хоҳлайди ва мен бунга розиман. Россияда жуда кўп иш ўринлари ва бойликлар яратиш учун улкан имкониятлар мавжуд».
• «Украина ҳам мамлакатни тиклаш жараёнида савдодан катта фойда олиши мумкин».
• «Россия ва Украина ўртасидаги музокаралар дарҳол бошланади. Мен бу ҳақда Украина президенти Владимир Зеленский, Европа комиссияси президенти Урсула фон дер Ляйен, Франция президенти Эммануэль Макрон, Италия бош вазири Жоржа Мелони, Германия канцлери Фридрих Мерц ва Финляндия президенти Александр Штуббага… президент Путин билан телефон орқали мулоқотдан сўнг дарҳол маълум қилдим».

АҚШ ва РФ президентларининг бу галги телефон мулоқоти Трамп Оқ уйга қайтганидан кейинги учинчи мулоқот бўлди. Трамп бир неча кун олдин суҳбатни эълон қилиб, Путин билан «қонли қирғин» — Россиянинг Украинага қарши урушини қандай тугатишни муҳокама қилишга ваъда берганди.

16 май куни Истанбулда Россия ва Украина делегацияларининг 2022 йилдан бери илк тўғридан-тўғри музокаралари бўлиб ўтди. Уларнинг якунлари бўйича томонлар эълон қилган ягона келишув «1000 га 1000» формуласи бўйича ҳарбий асирларни алмашиш бўлди.