Бу ҳақда EurasiaPluse ахборот агентлиги хабар берди.
Фото: Президент матбуот хизмати
Президентга метрони ТТЗгача узайтириш бўйича янгиланган лойиҳа тақдим этилди. У икки босқичда амалга оширилиши кутилмоқда. Биринчи босқичда линия «Пушкин» бекатидан Феруза массивигача бўлган темирйўл бўйлаб ўтади ва у ерусти метроси бўлади. Иккинчи босқичда эса линия ТТЗдаги шоҳ бекатигача чўзилади.
Шавкат Мирзиёевга Тошкент метрополитенини ривожлантириш бўйича режадаги лойиҳалар юзасидан ахборот берилди, деб хабар қилди давлат раҳбари матбуот хизмати.
Тақдимотда метрополитенни Тошкент трактор заводи даҳасигача олиб бориш режалари муҳокама қилинди. Эслатиб ўтамиз, метронинг «Пушкин» бекатидан ТТЗгача бўлган йўналишини узайтириш режалари илк бор март ойида эълон қилинганди. Кейинроқ транспорт вазири Илҳом Махкамов «Газета.uz»га янги линиянинг ерусти қисми темирйўл бўйлаб «Пушкин» бекатидан Акушерлик ва гинекология ИТИгача бориши, кейин эса еростига тушишини маълум қилганди.
Йиғилишда таъкидланишича, аввалги муҳокамаларда президент лойиҳани маблағ ва қулайлик жиҳатидан мақбуллаштириш вазифасини қўйган.
Шу асосида тайёрланган янги таклифга кўра, лойиҳани 2 босқичда амалга ошириш назарда тутилмоқда. Биринчи босқичда «Чилонзор» йўлининг «Пушкин» бекатидан Мирзо Улуғбек туманининг Феруза даҳасигача мавжуд темирйўлга параллел равишда ер юзаси бўйлаб метро йўли қурилади. Иккинчи босқичда у ердан Тошкент трактор заводи даҳаси шоҳ бекатигача йўналиш барпо этилади.
Ҳозирги кунда шу томондан пойтахт марказига бир кунда 47 мингта автотранспорт, жами 194 мингта йўловчи кириб келиши кузатилмоқда. Режалаштирилган янги йўналиш 85 минг йўловчини қамраб олиши кутилмоқда, дейилади хабарда.
Тақдимотда лойиҳанинг техник ва амалий жиҳатлари батафсил кўриб чиқилди.
Фото: gazeta.uz сайтидан олинди