Бу ҳақда EurasiaPluse ахборот агентлиги хабар берди.
АҚШ президенти Дональд Трамп Россия қўшинлари 25 майга ўтар кечаси Украинага дрон ва ракеталар билан йирик зарба берганидан кейин Россия президенти Владимир Путинни кескин танқид қилди.
«Мен ҳар доим Владимир Путин билан жуда яхши муносабатда бўлганман, лекин унга нимадир бўлди. У шунчаки ақлдан озибди! У бекордан-бекорга кўп одамларни ўлдиряпти, мен фақат солдатлар ҳақида гапираётганим йўқ. Ракеталар ва дронлар ҳеч қандай сабабсиз Украина шаҳарлари бўйлаб учирилмоқда», — деб ёзди Трамп Truth Social ижтимоий тармоғида. АҚШ президентининг қўшимча қилишича, Путин бутун Украинани босиб олмоқчи, бироқ Трампнинг фикрича, «агар у буни амалга оширса, бу Россиянинг қулашига олиб келади».
Трамп Украина президенти Владимир Зеленскийни ҳам танқид қилди. «Худди шундай, президент Зеленский ўз сўзлаш услуби билан мамлакатига ҳеч қандай фойда келтирмаяпти. Унинг оғзидан чиқаётган ҳамма нарса муаммо туғдирмоқда, бу менга ёқмаяпти ва буни тўхтатгани маъқул», — деди Трамп.
У бир неча бор таъкидлаган сўзларини яна такрорлади: «Мен президент бўлганимда, ҳеч қачон бу уруш бошланмаган бўларди».
«Бу Зеленский, Путин ва Байденнинг уруши, „Трамп“ уруши эмас, мен фақатгина қўпол лаёқатсизлик ва нафрат туфайли келиб чиққан кенг ва хунук ёнғинларни ўчиришга кўмаклашяпман».
Ўз навбатида, Трамп берилган зарбалардан «жуда ҳайратда қолганини» билдириб, Россияга қарши янги санкциялар жорий этишни «шубҳасиз» кўриб чиқаётганини айтди, деб ёзди The Guardian. Журналистнинг Трамп Россияга нисбатан қўшимча санкциялар жорий этиш имкониятини жиддий кўриб чиқяптими, деган саволига Трамп шундай жавоб берди: «Албатта. У кўп одамларни ўлдиради. Жин урсин, унга нима бўлди?»
Россиянинг Украинага дронлар билан ҳужуми
Россия Украинага кетма-кет ҳужумлар қилмоқда. Россия Қуролли кучлари 25 майга ўтар кечаси Украинага энг йирик зарбаларни берганди — қарийб 300 та дрон ва 70 та ракета учирилган. Камида 12 киши ҳалок бўлган.
«Россиянинг ҳар бир террористик зарбаси Россияга қарши янги санкциялар учун етарли сабабдир. Россия бу урушни ва ҳар куни ўлдиришни давом эттирмоқда. Дунёда ҳафта охирлаган бўлиши мумкин, аммо уруш дам олиш кунлари ва иш кунларидан қатъи назар давом этмоқда. Буни эътиборсиз қолдириб бўлмайди. Американинг жим туриши, дунёдаги бошқаларнинг жим туриши Путинга далда беради, холос», — деди мазкур зарбалардан сўнг Украина президенти Владимир Зеленский.
«Россия раҳбариятига чиндан ҳам кучли босим кўрсатмасдан, бу шафқатсизликни тўхтатиб бўлмайди. Санкциялар, албатта, ёрдам беради. Қатъийлик ҳозир муҳим — Қўшма Штатларнинг қатъияти, Европа давлатларининг, дунёдаги тинчликни хоҳлайдиганларнинг қатъияти. Дунё Россия иқтисодиётининг барча заиф томонларини билади. Урушни тўхтатиш мумкин, лекин фақат Россияга керакли босим кучи орқали. Путинни ракета учириш ҳақида эмас, балки урушни тугатиш ҳақида ўйлашга мажбур қилиш керак», — деб қўшимча қилди у.
26 майга ўтар кечаси эса Киевга зарба берувчи дронлардан фойдаланган ҳолда яна ҳужум қилинди. Шаҳар ҳарбий маъмурияти раҳбари Тимур Ткаченконинг маълум қилишича, Киевнинг Днепр туманидаги турар жой биноларидан бирининг ойналари синган, учувчисиз учиш аппаратининг бўлаклари гараж кооперативи ва дам олиш маскани ҳудудига қулаган. Ҳеч ким жабрланмаган.
Одесса вилоятида, маълумотларга кўра, дронлар ҳужуми оқибатида турар жой биноси вайрон бўлган, автомобиллар, гаражлар ва газ қувурига зарар етган. Хмельницкий вилоятида корхона ва турар жой биноларига, Днепропетровск вилоятида уйлар ва автомобилларга зарар етган. Жабрланганлар ҳақида хабар берилмаган.
Фото: gazeta.uz сайтидан олинди