Ўзбекистон мерганлари Туркиядаги мусобақада яна олтин медаль олди

Бу ҳақда EurasiaPluse ахборот агентлиги хабар берди.

Фото: Мудофаа вазирлиги

Туркиянинг Испарта шаҳрида 15 давлатнинг 48 та жамоаси иштирокида мерганлар беллашуви ўтказилди. Унда Ўзбекистон Мудофаа вазирлиги жамоаси олтин медални қўлга киритди. Бу мусобақада жамоа 4-марта қатнашмоқда: олдин икки марта иккинчи ва бир марта биринчи ўринга сазовор бўлинган. Фото, видео.

Lotinchada

Кеча, 22:44

Жамият

Туркияда 5−16 май кунлари V Халқаро «Энг илғор мерганлар жамоаси» мусобақаси ўтказилди. 15 давлатнинг 48 та жамоаси иштирокидаги беллашувда Ўзбекистон Мудофаа вазирлиги жамоаси олтин медални қўлга киритди, деб хабар бермоқда вазирлик.

Баҳслар Туркиянинг Испарта шаҳридаги «Командо» тоғ-ўқув машқлар марказида ташкилланди. Унда Ўзбекистон, Туркия, Покистон, Қатар, Озарбайжон, Италия, Бирлашган Араб Амирликлари — ўндан ортиқ давлат, шунингдек, кузатувчи мақомида Туркманистон, Қозоғистон, Буюк Британия ва Қувайт иштирок этди. Мусобақа иштирокчилари гуруҳларга бўлиниб, 15 га яқин шарт бўйича баҳс олиб борди.

Хусусан, жамоалар юқори бурчак остида ўқ отиш, газниқоб тақиб, жанговар ўқ отиш, ноаниқ масофаларга ноқулай истеҳкомдан ўқ отиш, турли тўсиқлар ортидан ўқ отиш, ҳаводаги вертолётдан ўқ отиш, оролни ҳимоя қилиш ва қайиқдан жанговар ўқ отиш, нишонга сездирмай яқинлашиб ўқ отиш, 5 км масофадан юк ва қурол билан югуриб келиб, совуқ стволдан ўқ отиш, тунда номалум масофаларга ўқ отиш ва «сюрприз» шартларини бажарди.

Туркияда ўтказиладиган мазкур мусобақада Ўзбекистон жамоаси 4-маротаба иштирок этмоқда, 2022 ва 2023 йилларда 2-ўринни, 2024 йилда эса 1-ўринни эгаллаганди.