Бу ҳақда EurasiaPluse ахборот агентлиги хабар берди.
Фото: Президент матбуот хизмати
Венгрияга ташрифини якунлаган Ўзбекистон президенти Словения пойтахти Люблянага етиб борди. У мамлакат раҳбари ва парламенти билан учрашувлар ўтказиб, қўшма бизнес форумида иштирок этиши режалаштирилган.
Ўзбекистон президенти Шавкат Мирзиёев 21 май куни Словения президенти Наташа Пирц Мусарнинг таклифига биноан расмий ташриф билан Люблянага етиб борди. Бу ҳақда меҳмон давлат раҳбари матбуот хизмати хабар берди.
Самолёт олдида Ўзбекистон етакчисини бош вазир ўринбосари — ташқи ишлар вазири Таня Файон ва бошқа расмий шахслар кутиб олди.
Йоже Пучник номидаги халқаро аэропортда меҳмон шарафига икки мамлакат давлат байроқлари кўтарилди, фахрий қоровул саф тортди.
Ташриф дастурига мувофиқ, Шавкат Мирзиёев Наташа Пирц Мусар билан музокаралар ўтказади, мамлакат парламенти ва ҳукумати раҳбарияти билан учрашувлар ўтказади, қўшма бизнес форумида иштирок этади.
Ўзаро манфаатли савдо-иқтисодий шерикликни ривожлантириш, саноат, фармацевтика, электротехника, «яшил» энергетика, қишлоқ хўжалиги соҳаларида кооперация лойиҳаларини амалга ошириш, меҳнат миграцияси бўйича ҳамкорлик ва гуманитар алоқаларни кенгайтириш масалалари кўриб чиқилади.
Эслатиб ўтамиз, президент Европага ташрифини 19 май куни Венгриядан бошлаганди. У Будапештда олий даражадаги Ўзбекистон-Венгрия музокараларини ўтказди, мамлакат етакчи компаниялари раҳбарлари билан янги қўшма лойиҳаларни келишиб олди, Туркий давлатлар ташкилотининг норасмий саммитида иштирок этди.
Фото
Фото: gazeta.uz сайтидан олинди