Бу ҳақда EurasiaPluse ахборот агентлиги хабар берди.
Январь-март ойларида Ўзбекистон аҳолисининг умумий даромадлари 222,4 трлн сўмга етди, дейилади Миллий статистика қўмитаси ҳисоботида.
Умумий даромад — аҳоли фаровонлиги даражасини кўрсатадиган асосий кўрсаткичлардан бири. У нафақат меҳнат фаолияти ва ўзини ўзи иш билан таъминлашдан олинган даромадлар, балки мулкдан (фоизлар, дивидендлар, роялтилар ва бошқалар) ва трансфертлардан (пенсиялар, нафақалар, стипендиялар, пул ўтказмалари) даромадлардан ҳам иборат ҳисобланади. Аҳоли жон бошига тўғри келадиган умумий даромад — бу маълум бир ҳудуд (масалан, мамлакат) аҳолиси томонидан олинган жами даромадларнинг бу ҳудудда яшовчи одамлар сонига нисбати ҳисобланади. Бу ҳар бир инсоннинг ўртача қанча даромад олишини баҳолаш имконини беради ва турли ҳудудлар ёки мамлакатлардаги турмуш даражасини солиштириш учун ишлатилади.
Номинал кўрсаткичда ўсиш 20,9 фоизни, реал ўсиш (инфляцияни ҳисобга олганда) суръати эса 9,8 фоизни ташкил этди. Ўтган йилнинг биринчи чорагида бу кўрсаткичлар мос равишда 20,8 ва 11,5 фоизни ташкил қилган.
Аҳоли жон бошига умумий даромадлар 18,5 фоизга (инфляцияни ҳисобга олган ҳолда — 7,6 фоизга) — 4,7 млн сўмдан 5,9 млн сўмгача (ойига 1,97 млн сўм) ошди. Ўтган йилнинг шу даврида ўсиш 18,2 фоиз ва 9,2 фоизни ташкил қилган.
Номинал ҳисобда даромадлар ўсиши бироз яхшиланган бўлса-да, реал ўсиш секинлашди.
| Ҳудуд | Аҳоли жон бошига даромад, минг сўм | Реал ўсиш суръати, % |
| Тошкент шаҳри | 15 859,0 | 9,8 |
| Навоий | 9 452,7 | 10,1 |
| Бухоро | 6 364,2 | 6,8 |
| Тошкент | 6 134,5 | 3,3 |
| Хоразм | 5 510,4 | 7,9 |
| Андижон | 5 077,8 | 8,6 |
| Самарқанд | 4 970,2 | 6,6 |
| Фарғона | 4 890,3 | 14,5 |
| Сирдарё | 4 625,4 | 3,4 |
| Жиззах | 4 531,7 | 2,9 |
| Қашқадарё | 4 235,0 | 6,3 |
| Қорақалпоғистон Республикаси | 4 117.2 | 3,8 |
| Сурхондарё | 4078,5 | 4,3 |
| Наманган | 3 966,0 | 3,4 |
Аҳоли жон бошига ўртача номинал умумий даромадлар Тошкент шаҳрида (12,38 млн сўмдан 15,86 млн сўмгача ошган), Навоий вилоятида (7,4 млн сўмдан 9,45 млн сўмгача), Бухорода (4,89 млн сўмдан 6,36 млн сўмгача) ва Тошкент вилоятида (4,95 млн сўмдан 6,1 млн сўмгача) республика бўйича ўртача кўрсаткичдан юқори бўлди.
Энг паст кўрсаткичлар Қорақалпоғистон Республикасида (4,12 млн сўм), Сурхондарё (4,08 млн сўм) ва Наманган вилоятида (3,97 млн сўм) кузатилди.
Аҳоли жон бошига даромадларнинг энг юқори реал ўсиши Фарғона (+14,5 фоиз), Навоий (10,1 фоиз), Тошкент (9,8 фоиз) ва Андижон вилоятида (8,6 фоиз) қайд этилди. Жиззах ва Тошкент вилоятларида ўсиш атиги 2,9 ва 3,3 фоизни ташкил этди.
Ҳудудлар орасидаги фарқлар кенгайди. Бир йил давомида энг бой учта ва энг камбағал учта ҳудуд ўртасидаги аҳоли жон бошига даромадлар фарқи 2,48 баравардан 2,6 бараваргача ошди. Таққослаш учун: 2020 йилда бу фарқ 2,15 бараварга тенг эди. Тошкент шаҳри ва Наманган вилояти ўртасидаги даромадлар фарқи 3,75 баравардан қарийб 4 бараваргача ошди.
Даромадлар таркибида меҳнат фаолияти улуши (ёлланма ишчилар ва ўзини ўзи банд қилганлар) 59,2 фоиздан 57,7 фоизгача камайди. Ёлланма ишчиларнинг даромадлари ўтган йилнинг биринчи уч ойида 17,7 фоизга ўсган бўлса, бу йилнинг мос даврида 20,3 фоизга ошди. Ўзини ўзи банд қилганлар даромадлари эса (ўтган йили 14,8 фоиз бўлган) 17,5 фоизга ўсди.
Шу билан бирга, трансфертлардан тушган даромадлар (пул ўтказмалари, нафақалар, пенсиялар, стипендиялар) улуши 27,8 фоиздан 29,9 фоизгача ошди.
Аҳолининг умумий даромадларида (бошқа жорий трансфертларни ҳисобга олган ҳолда) хориждан пул ўтказмаларининг улуши 15,8 фоиздан 19,5 фоизгача ошди.
Инфографика: Миллий статистика қўмитаси
Пул ўтказмаларига Андижон (жами даромаднинг 33 фоизи), Фарғона (30,2 фоиз) ва Самарқанд (26,8 фоиз) вилоятлари аҳолиси кўпроқ боғланган.
Фото: gazeta.uz сайтидан олинди