Бу ҳақда EurasiaPluse ахборот агентлиги хабар берди.
Ultima Yandex Go премиум хизмати жамоаси Тошкентда биринчи марта Ultima Guide ресторан гидини тақдим этди. Хизмат нейротармоқ, экспертлар ва фойдаланувчилар ўртасида овоз бериш орқали шаҳарнинг энг яхши 20 та ресторанини аниқлади.
Ultima Guide рўйхатига киритилган Тошкентдаги ресторанлар номи 22 май куни Hilton Tashkent City`да ўтган маросимда эълон қилинди, жараёнда «Газета.uz» мухбири ҳам иштирок этди.
Топ-20 таликка OBI Hayot ва The Choyxona каби миллий таомларга эга пойтахт ресторанлари, Basilic, La Mer, Punto, Quadro каби Европа ва Ўрта денгиз таомлари мавжуд ресторанлар, шунингдек, Gravity ва Restaurant 12 каби манзарали муассасалар кирди.
Afisha Media асосчиси Сурен Сапов ва унинг тижорий ишлар бўйича директори Ирина Салихова томонидан очилган Zira Cafe топдаги ягона кафе бўлди.
«Тошкентда кафе ва ресторанларга ташқаридан баҳо олиш имконини берувчи мукофот пайдо бўлгани қувонарли. Тошкентдаги энг яхши муассасаларнинг дастлабки рўйхатида эканимиздан мамнунмиз. Агар мукофотнинг юқори қисмига диққат билан қарайдиган бўлсак, биз унда ягона маҳаллий кафемиз. Бу жуда юқори кўрсаткич, умидларни оқлашга ҳаракат қиламиз», — деди Ирина Салихова.
Барча муассасалар мукофотни латундан ясалган марварид шар кўринишида қабул қилиб олди. Статуэткалар финалчи ресторанларнинг фарқлаш белгиси бўлади.
Қўшимча номинациялар бўйича мукофотларни учта ресторан қўлга киритди. «Мясной» стейк-ҳауси «Фойдаланувчилар танлови» ва «Аъло даражадаги хизмат» номинациялари бўйича ғолиб бўлди. «Сыроварня» ресторани «Экспертлар танлови» бўлди, энг яхши интерьер учун Lali мукофотланди.
Ultima Guide ресторанлари рўйхати лойиҳа веб сайтида ўзбек ва рус тилларида ҳамда Yandex Go`нинг «Еда» бўлимида мавжуд. Финалчиларни «Ultima Guide» қидируви орқали Yandex Maps`дан ҳам топиш мумкин. Бундан ташқари, муассасалар гиддан Yandex Maps`да Ultima Guide махсус белгиларини олади.
Гид ҳар йили янгиланади. Yandex Go вакилларининг таъкидлашича, Ultima Guide`га хизматнинг ҳамкор ресторанларигина киритилган эмас.
Дастлаб нейротармоқ Тошкент шаҳридаги 3000 дан ортиқ муассасани 100 дан ортиқ мезонлар бўйича таҳлил қилди. Овоз бериш бошланган пайтда фаолиятига уч ой бўлмаган муассасалар, шунингдек, классик барлар, қаҳвахоналар, фуд-моллар ва тармоқ ресторанлари Ultima Guide`га кириш учун даъвогарлар рўйхатидан чиқарилди. «Бундай форматлар учун бошқача ёндашув талаб этилади», — дея таъкидлади компания.
Сунъий интеллект белгиланган параметрлар бўйича 140 та ресторанни танлаб олди, шундан сўнг овоз бериш бошланди. Унда рестораторлар, шефлар ва гастроинфлуенсерлардан иборат 39 нафар маҳаллий эксперт, шунингдек, Yandex хизматлари орқали муассасалар билан ўзаро алоқада бўлган 4500 нафар Yandex Go фойдаланувчиси иштирок этди. Ҳар бир фойдаланувчи бир марта — индивидуал ҳавола орқали овоз бериши мумкин бўлди.
Овоз бериш натижаларини Yandex компаниясининг ўз баҳолаш модели ҳисоблаб чиқарди, уларни «Яков и Партнёры» халқаро консалтинг компанияси текширди. Танлов методологиясини яратишда Россия, Шарқий Европа ва Марказий Осиёдаги The World’s 50 Best Restaurants ҳакамлар ҳайъати раиси Екатерина Пугачёва ёрдам берди. Ҳозирда Ultima Guide лойиҳаси учта мамлакатда ривожланмоқда.
Фото: gazeta.uz сайтидан олинди