Президент Қасым-Жомарт Тоқаев қазақстандықтарды Ораза айт мерекесімен құттықтап, оның Наурызбен тұспа-тұс келуінің символдық мәні зор екенін атап өтті, деп хабарлайды EurasiaPulse.com ақпарат агенттігі.
Мемлекет басшысы Ораза айттың рухани тазару, мейірімділік пен жанашырлық сияқты құндылықтарды дәріптейтін, мұсылман қауымы үшін маңызы ерекше мереке екенін жеткізді.
Оның айтуынша, отыз күн ораза тұтқан адамдар иманын байытып, төзімділігін шыңдайды және мұқтаж жандарға көмек қолын созады. Президент бұл мейрамның ел бірлігін нығайтуға үндейтінін де атап өтті.
«Биыл Ораза айт мейрамы Наурыз мерекесімен қатар келіп, ел дамуындағы жаңа тарихи кезеңнің жаршысына айналды. Мұның символдық мәні зор. Қазақстан халқы жаңа Ата заңды қабылдап, жарқын болашаққа, әділеттілік пен өркендеуге бастайтын жолды таңдады», – деді Мемлекет басшысы.
Соңында президент барша халыққа зор денсаулық, бақ-береке және толайым табыс тілеп, еліміздің амандығын сұрады.