Бұл туралы EurasiaPluse ақпарат агенттігі хабарлады.
Аустралияда жаңа парламент сайлауы өтуде
Аустралияда федералды парламент сайлауы өтіп жатыр. Бұл саяси додада Сенаттың 40 және Өкілдер палатасының 150 орын иелері анықталады. Сенат мүшелері алты жылға, ал Өкілдер палатасының депутаттары үш жылға сайланады.
Аустралия сайлау комиссиясының мәліметіне сәйкес, заң шығарушы органдағы орындарға 1456 кандидат таласуда: оның 330-ы Сенатқа, 1126-сы Өкілдер палатасына үміткер. Дауыс беру учаскелері жергілікті уақыт бойынша таңғы сағат 8-де ашылып, кешкі 6-ға дейін жұмыс істейді. Алғашқы биресми деректерге қарағанда, 18,1 миллион аустралиялықтың 5,7 миллионы мерзімінен бұрын дауыс беріп, тағы 1,5 миллионнан астамы бюллетеньдерін пошта арқылы жіберген. Ал 333,4 мыңнан астам азамат сайлаушылар тізіміне тіркелмеген.
Аустралия сайлауында негізгі бәсеке үнемі екі ірі саяси күш арасында өтеді: қазіргі премьер-министр Энтони Альбанезе жетекшілік ететін Австралия лейбористік партиясы (АЛП) және Питер Даттон бастаған Либералды-ұлттық коалиция (ЛҰК). Лейбористер солшыл-орталық бағытты ұстанса, ЛҰК көбіне консервативтік саяси ұстанымдарды қорғайды.
Әдетте, қос партияның сайлауалды бағдарламаларында халыққа әлеуметтік кепілдіктер, шағын және орта бизнесті қолдау, ұлттық компаниялар дамуын күшейту сияқты ортақ ұстанымдар бар. Алайда биыл Либералды-ұлттық коалиция (ЛҰК) түбегейлі жаңа бастамалар көтерді.
Либералдардың негізгі уәделері:
- Елдің қорғаныс бюджетін 2035 жылға қарай 2%-дан 3%-ға дейін арттыру;
- Аустралияда жеті атом электр станциясын салу. ЛҰК басшысы Питер Даттон алғашқы реакторды 10-12 жыл ішінде іске қосуға уәде беріп отыр. Бұл бастама елдің энергетикалық саясатындағы маңызды өзгеріс саналады. Себебі бұған дейін Аустралияда атом энергетикасын пайдалануға рұқсат болмаған.
Даттонның айтуынша, атом энергетикасы Аустралияның энергия тапшылығын шешіп, 2042 жылға қарай парниктік газ шығарылымын нөлге дейін қысқартуға сеп болады.
Аустралия сайлауы, федералды парламент, Сенат және Өкілдер палатасы — елдің саяси ахуалындағы басты жаңалықтардың бірі болып отыр.
Фото: inform.kz сайтынан алынды