Бұл туралы EurasiaPluse ақпарат агенттігі хабарлады.
Қазақстан Республикасының Президенті Ұлттық құрылтай отырысында еліміздің материалдық және материалдық емес мұраларын ЮНЕСКО-ның халықаралық тізімдеріне енгізудің маңыздылығын атап өтті. Мемлекет басшысы, «Төрткүл дүние елді дәл осы тізімдер арқылы танып біледі. Қазақстан – бірегей тарихи-мәдени жәдігерлерге толы», – деді.
«Әлемдік деңгейде танылған Қожа Ахмет Ясауи кесенесі, Тамғалы петроглифтері, Қаялық, Талғар, Ақыртас қалашықтары сынды ескерткіштеріміз ұлттық мақтанышымыз. Біз бұл мұраларды туристерді тартатын орталықтарға айналдыруымыз қажет. Оларды фильмдер мен бағдарламаларда көрсету, сондай-ақ, кітаптар мен мектеп оқулықтарына енгізу керек», – деді О. Бектенов.
Сонымен қатар, ЮНЕСКО-да материалдық емес мәдени мұралар тізімі бар, оған дәстүрлі күй өнері, қазақ күресі, асық ойыны, беташар салты, «Ортеке» биі секілді ұлттық құндылықтар енген.
«ЮНЕСКО тізіміне жаңа мәдени мұра нысандарын енгізу бойынша жұмыс жалғасуы тиіс. Материалдық емес мұрамызды, мысалы, қолөнерді үйрету және әдет-ғұрыптарды сақтауды Үздік тәжірибелер тізіміне енгізуге назар аударуымыз керек. Әзербайжан, Иран, Ресей және Түрікменстанмен бірлесіп, «Жібек жолы: Каспий-Еділ дәлізі» атты трансұлттық номинациясын дайындауымыз қажет», – деді О. Бектенов.
Үкімет басшысы Мәдениет министрлігін ЮНЕСКО аясында мәдени мұраны сақтау және ілгерілету жөніндегі кешенді жоспар әзірлеуге тапсырыс берді. Жоспар 1 қыркүйекке дейін Үкімет отырысына ұсынылуы қажет.
Сонымен қатар, Мәдениет министрлігі мүдделі органдармен, әкімдіктермен бірлесіп, тарих және мәдениет ескерткіштерінің түгендеуін жүргізіп, 1 тамызға дейін қажетті құжаттарды ЮНЕСКО-ға жолдауы тиіс.
Түркістан, Жамбыл, Алматы және Жетісу облыстарының әкімдіктері 15 қыркүйекке дейін дүниежүзілік мұра объектілерінің аймақтарын мемлекеттік жер кадастрының ақпараттық жүйесіне енгізуге міндетті.
«Туризм министрлігі Мәдениет министрлігімен бірлесіп, мәдени мұра объектілері мен элементтерін ескеретін туристік маршруттарды әзірлеуі қажет. Цифрландыру министрлігімен бірлесіп, ЮНЕСКО тізімдеріне енген объектілер мен элементтер бойынша цифрлық танымдық өнімдер жасау керек», – деді О. Бектенов.
Мәдениет министрі Аида Балаева Қожа Ахмет Ясауи кесенесі маңындағы құрылыс жұмыстарының келісілмегенін мәлімдеген болатын. Сонымен бірге, 2026 жылы еліміздің 11 ескерткішін ЮНЕСКО тізіміне енгізу жоспарланып отыр.
Фото: inform.kz сайтынан алынды