Бул тууралуу EurasiaPluse маалымат агенттиги билдирди.
АКИpress – Цитрус жемиштери С витаминине гана эмес, ошондой эле организмди коргоочу антиоксиданттар – флавоноиддерге жана иммунитетти көтөрүүчү табигый заттар – фитонциддерге да бай. Курамында тамак сиңирүүнү жакшыртуучу жана организмден токсиндерди чыгарууга көмөктөшүүчү пектиндер көп.
Россиянын керектөөчүлөрдүн укугун коргоо жана көзөмөлдөө боюнча федералдык кызматы (Роспотребнадзор) цитрус жемиштеринин пайдасы жөнүндө эскертти:
1. Лимон. Курамында С витамининин сиңимдүүлүгүн жакшыртуучу цитрин бар. Мындан тышкары, лимон кан тамырлардын тонусун нормалдаштырат, нерв системасынын ишин турукташтырат. Бул жемиштердин курамында белок, углевод жана темирдин туура сиңишине көмөктөшүүчү жез көп.
2. Апельсин. Аскорбин кислотасына гана эмес, В1, В2, В4, В5 жана В6 витаминдерине да бай. Алардын негизги пайдасы – нерв системасынын жана мээнин ден соолугун колдоо. Апельсинде А витамини жана бета-каротин да бар.
3. Мандарин. Курамы боюнча апельсинге окшош. Мындан тышкары, аларда флавоноид нобилетининин концентрациясы жогору. Ал боордо майдын топтолушун алдын алат, кан тамырларда холестериндин топтолушуна тоскоол болот жана клеткалардын инсулинге сезгичтигин жогорулатат.
4. Грейпфрут. Курамында боорго майларды активдүү түрдө күйгүзүүгө жардам берген, зат алмашууну тездетүүчү, кандагы холестериндин деңгээлин төмөндөтүүчү, табитти басуучу ачуу флавоноид нарингенин бар.
Тандоо боюнча кеңештер
Жол боюндагы уруксатсыз соода түйүндөрүнөн жемиштерди сатып албоо керек.
Сатуучуда сатылып жаткан продукциянын сапатын жана коопсуздугун тастыктаган документтери болушу керек.
Бузулуунун белгилери жок, бүтүн кабыгы бар, бышкан цитрус жемиштерин тандоо керек.
Колдонуудан мурун жемиштерди кылдаттык менен жууш керек. Бул курч ичеги-карын инфекциялык ооруларынын жана уулануулардын алдын алуу болуп саналат.
Сүрөт: akipress.org сайтынан алынды