Бу ҳақда EurasiaPluse ахборот агентлиги хабар берди.
16 май куни Истанбулда Россия ва Украинанинг тўғридан-тўғри музокаралари якунланди. Бу 2022 йилдан бери урушаётган томонларнинг биринчи учрашувидир.
Украина делегациясига мамлакат мудофаа вазири Рустем Умеров, Россия делегациясига эса Россия президенти ёрдамчиси Владимир Мединский бошчилик қилди. Делегацияларнинг тўлиқ таркиби ва Киев ва Москванинг тўғридан-тўғри музокараларга қандай келгани ҳақида бу ерда ўқиш мумкин.
Музокаралар Туркия ташқи ишлар вазири Ҳакан Фидан иштирокида бўлиб ўтди ва тахминан икки соат давом этди. Ҳозирча эълон қилинган ягона келишув — «1000 га 1000» формуласи бўйича ҳарбий асирларни алмашиш. Бу ҳақда Умеров ҳам, Мединский ҳам маълум қилди.
Мединский, шунингдек, музокаралардан сўнг Россия делегацияси «натижалардан қониқиш ҳосил қилгани ва алоқаларни давом эттиришга тайёрлигини» айтди. Унинг сўзларига кўра, Украина Владимир Путин ва Владимир Зеленский ўртасида тўғридан-тўғри музокаралар ўтказишни сўраган. «Биз бу сўровни маълумот учун қабул қилдик», — деди у.
Бундан ташқари, деди Мединский, томонлар ҳар бири «келажакдаги эҳтимолий ўт очишни тўхтатиш бўйича ўз қарашларини» тақдим этиши, шундан сўнг музокаралар қайта бошланиши ҳақида келишиб олди.
Украина делегацияси раҳбари Умеров ҳозирча расмий баёнот бермади, унинг матбуот анжумани кейинроқ ўтказилиши кутилмоқда.
ОАВ нима деб ёзмоқда?
Reuters агентлигининг Украина дипломатик доираларидаги манбасининг айтишича, Россия делегацияси талаблари «ҳақиқатдан узилиб қолган ва илгари муҳокама қилинган барча нарсалар доирасидан анча ташқарига чиққан». Хусусан, гап ўт очишни тўхтатиш учун Украина ўз ҳудудидан (қисман Россия томонидан босиб олинган) қўшинларини олиб чиқиб кетиши ҳақида борган.
The Economist мухбири Оливер Кероллнинг хабардор манбасига таяниб хабар беришича, Россия Украина қўшинларини тўрт вилоятдан (Луганск, Донецк, Херсон ва Запорожье вилоятлари) олиб чиқиб кетиш талабларидан ташқари, Украинанинг Харьков ва Суми вилоятларини ҳам эгаллаб олиш билан таҳдид қилган. Бундан ташқари, суҳбатдошнинг сўзларига кўра, Мединский музокараларда Украина делегациясига шундай савол берган: «Биз урушни хоҳламаймиз, лекин яна бир йил, икки, уч йил — қанча керак бўлса, шунча урушишга тайёрмиз. Биз Швеция билан 21 йил урушдик. Сиз қанча вақт жанг қилишга тайёрсиз?»
Фото: gazeta.uz сайтидан олинди