«Атамекен» ұлттық кәсіпкерлер палатасының басшысы Қанат Шарлапаев алғаш рет қазақ тілінде сұхбат берді. Бұл туралы Adal Adam YouTube-арнасында жарияланған сұхбатта айтылды, деп хабарлайды EurasiaPulse.com ақпарат агенттігі.
Жүргізуші Шарлапаевтың бірнеше жыл бұрын, министр кезінде қазақшаға шорқақ болғанын, ал қазір тілі анағұрлым жатық екенін атап өтті. Оның тілді қалай меңгергені туралы сұраққа палата басшысы былай деп жауап берді:
Бұл сұхбат – мен үшін үлкен сынақ. Қазақ тілінде бірінші рет сұхбат беріп отырмын. Әлі де жұмыс көп, тілді одан әрі шыңдау керек. Қазір кәсіпкерлер де, мемлекеттік қызметкерлер де – көбі қазақша сөйлейтін азаматтар. Оларға ойыңды жеткізу үшін, әрине, қазақша сөйлеу қажет. Шынымды айтсам, тіл үйрену үшін екі нәрсе керек: ынта мен уақыт.
Сондай-ақ ол тіл үйренуіне журналистердің сыны түрткі болғанын жасырмады.
Кезінде журналистер мені сынап, «қазақша білмейді» деп айтты. Маған ұят болды да, үйрене бастадым. Репетитор керек, уақыт керек. Содан кейін қазақша сөйлесуге тырысу қажет, – деді ол.
2023 жылы Қанат Шарлапаев министр кезінде журналистерге қазақ тілін күнде дерлік оқып жүргенін айтқан. Ол тіл білмеуін қандас екенімен түсіндірген еді. Бұған дейін Шарлапаевтың Ресей және Ұлыбритания азаматтығы болған. Тумысынан берілген Ресей азаматтығынан кейін бас тартып, Қазақстан паспортын 2022 жылы алған.