Президент Қасым-Жомарт Тоқаев «Тазару күніне» орай қазақстандықтарға үндеу жасап, «Таза Қазақстан» жалпыұлттық жобасының жаңа кезеңі басталғанын мәлімдеді, деп хабарлайды EurasiaPulse.com ақпарат агенттігі.
Мемлекет басшысының айтуынша, бұл ауқымды экологиялық акция Наурызнама онкүндігі аясында өтіп, қоғамның жаңғыруы мен табиғаттың жаңаруын білдіреді. Ол отандастарды табиғатқа қамқорлықпен қарауға шақырды.
Бүкіл республика аумағында «Мөлдір бұлақ» бастамасы жаппай қолға алынды. Бұл жоба аясында бұлақтардың көзін ашып, жағалаулар мен су айдындарын, аулалар мен саябақтарды тазалау, сондай-ақ ағаш егу жұмыстары жалғасады.
Президент «Таза Қазақстан» тұжырымдамасының мәні тек көшелерді таза ұстаумен шектелмейтінін баса айтты. Бұл – азаматтардың әл-ауқатын арттыруға бағытталған таза ниет пен пейілдің көрінісі.
«Бәріміз күш біріктірсек, елімізді биік белестерге жетелеп, Әділетті, Таза, Өркендеген Қазақстанды құра аламыз», — деді Президент.
Мемлекет басшысы саналы тұтыну жолын таңдаған азаматтар санының артуы жарқын болашаққа кепіл болатын игі үрдіс екенін атап өтіп, бүкіл халықты тазалық пен тәртіп эстафетасына белсене қатысуға үндеді.
