Таяу Шығыстағы соғыс аймақтың туризм саласына күніне 600 миллион доллар шығын әкелуде, деп хабарлайды EurasiaPulse.com ақпарат агенттігі.
Саяхатшылар Таяу Шығысқа жоспарлаған сапарларынан жаппай бас тартып жатыр. AirDNA аналитикалық компаниясының дерегінше, 6 наурызға дейінгі бір аптаның ішінде тек Дубайда Airbnb және Vrbo сияқты платформалар арқылы жасалған 80 мыңнан астам қысқа мерзімді жалдау броны жойылған.
Қақтығыс басталғанға дейін Дүниежүзілік саяхат және туризм кеңесі (World Travel & Tourism Council) биыл шетелдік туристер Таяу Шығыста шамамен 207 миллиард доллар жұмсайды деп болжаған еді.
Дубай сияқты қалалар ұзақ уақыт бойы сәнді демалыс, жыл бойы жарқыраған күн және саяси шиеленістерге толы аймақтағы салыстырмалы тыныштықтың арқасында гүлденіп келген.
Алайда қазіргі қақтығыс ең қымбат қонақүйлерге де зардабын тигізді. Әуе шабуылына қарсы қорғаныс жүйесі атып түсірген зымырандардың сынықтары Дубайдағы әйгілі Burj Al Arab қонақүйіне құласа, Palm Jumeirah аралында орналасқан Accor желісіне тиесілі Fairmont The Palm ғимаратына тікелей соққы жасалған.
Аймақтың ірі авиациялық хабтары — Абу-Даби, Дубай, Доха және Бахрейн — әдетте күніне жарты миллионнан астам жолаушыға қызмет көрсетеді. Бірақ Cirium аналитикалық компаниясының мәліметінше, бес күнге созылған рейстердің жаппай тоқтатылуы салдарынан 4 миллионға жуық саяхатшы әуежайларда қалып қойды.