Бұл туралы EurasiaPluse ақпарат агенттігі хабарлады.
RMC телеарнасының эфирінде Францияның министрі университеттерде хиджабқа тыйым салу мәселесіне қатысты пікір білдірді. Журналистің «Университеттерде хиджабқа тыйым салған жөн бе?» деген сұрағына министр оң жауап берді.
Министрдің айтуынша, хиджабқа тыйым енгізу – ислам дінінің радикалды ағымдарына қарсы шара. Оның айтуынша, қазіргі уақытта дәстүрлі исламмен байланысы жоқ «исламизмнің» таралуы қоғам үшін алаңдатарлық. Министр бұл бағыт өз құндылықтарын, оның ішінде "әйелдің ер адамға бағыныштылығы" сияқты ұстанымдарды күштеп енгізуге тырысатынын баса айтты.
Ретайо өз сөзінде бұл көзқарасы мұсылман қауымына қарсы бағытталмағанын жеткізді. «Саяси ислам – мұсылмандардың сенімін бұрмалайды», – деп атап өтті министр.
Министр бұған дейін «Хиджаб – өлім» деген мәлімдемесінің мәнін де түсіндіріп өтті. Оның айтуынша, бұл сөздерінен бас тартпайды және өз көзқарасын сақтайды.
Айта кетейік, Францияда 2004 жылдан бастап мектептерде хиджаб киюге заң жүзінде тыйым салынған. Бірақ бұл талап қазіргі таңда университеттерге таралған жоқ. Хиджаб мәселесі әлі де қоғамда талқыланып келеді және Францияда көп жағдайда радикализмге қарсы күрес, әйел құқығы мен қоғамдағы зайырлылықты сақтаумен байланысты қарастырылады.
Кілтсөздер: Францияда хиджабқа тыйым, университеттерде хиджаб, радикалды ислам, исламизм, әйел құқығы, зайырлы қоғам
Фото: inform.kz сайтынан алынды