Бұл туралы EurasiaPluse ақпарат агенттігі хабарлады.
Францияда "Мұсылман бауырлар" қозғалысына қарсы шаралар күшейтілді
Франция президенті Эммануэль Макрон республикалық институттарға исламшыл ұйымдардың ықпалына қарсы тұруға шақырды. Бұл жөнінде France International радиосы хабарлады. Қауіпсіздік және ұлттық қорғаныс кеңесінің отырысында, ең алдымен, елдегі "Мұсылман бауырлар" қозғалысына (Қазақстанда тыйым салынған ұйым) ерекше назар аударылды. Француз шенеуніктері бұл ұйымның іс-әрекеті ұлттық бірлікке қауіп төндіретінін атап өтті. Ал, аталмыш құрылым өзіне тағылған айыптарды жоққа шығарып, Франция үкіметін исламофобияға айып тақты.
Президент Макрон 2017 жылы қызметіне кіріскеннен бастап терроризммен және радикалды исламмен күресті басты бағыттарының бірі ретінде жариялаған еді. Сол кезеңнен бері елде төтенше жағдай режімі ұзартылып, ішкі қауіпсіздік пен терроризмге қарсы заң қабылданып, арнайы қызметтердің мүмкіндігі артты.
Қауіпсіздік кеңесінің мәліметінше, "Мұсылман бауырлар" қозғалысы Францияда белсенді түрде таралып жатыр. Бұл ұйым оқшаулану немесе анклавтар құруды көздейтін сепаратистерден айырмашылығы, мемлекеттік құрылымдарға – әсіресе муниципалитеттерге – енуге тырысады. Францияның ішкі істер министрі Бруно Ретайло: "Олардың түпкі мақсаты – француз қоғамын шариғат заңына сай өмір сүруге мәжбүрлеу. Бұл – Франция Республикасының негіздеріне және ұлттық бірлікке қарсы", – деп мәлімдеді.
Еске сала кетейік, бұған дейін Қазақстан мен Франция арасында адамдарды реадмиссиялау туралы келісім қаралған болатын.
Кілтсөздер: Франция, Эммануэль Макрон, ұлттық қауіпсіздік, Мұсылман бауырлар, терроризмге қарсы күрес, исламшыл ұйымдар, француз үкіметі, шариғат, ішкі істер министрлігі.
Фото: inform.kz сайтынан алынды