Бұл туралы EurasiaPluse ақпарат агенттігі хабарлады.
Швеция жатыр мойны обырын толықтай жоюға жақын
Швеция жатыр мойны обырын толық жойған әлемдегі алғашқы ел атануға мүмкіндік алып отыр. Бұл аурудың басты себебі — адам папилломасы вирусы (АПВ), ол жыл сайын 1100-ге жуық қатерлі ісік түрінің пайда болуына әсер етеді. Соның ішінде 500-ден астамы — жатыр мойны қатерлі ісігі.
Жатыр мойны обырына қарсы Швецияда ауқымды вакцинация бағдарламасы іске асырылып жатыр. 1994–1999 жылдары туған әйелдер 2025 жылдың 30 маусымына дейін АПВ-ге қарсы тегін вакцина салдыра алады. Бүгінде қажетті 70% қамтудың 59%-ы ғана жүргізілген. 30 маусымнан кейін вакцинаның бағасы 6000 швед кронын (шамамен 550 АҚШ доллары) құрайды.
22 мамыр күні елдегі бірнеше кинотеатрда тегін вакцинация ұйымдастырылады. Бұл күні екпе салдырған азаматтарға киноға тегін билет ұсынылады. Аталған шараға барлық 21 өңір, Қатерлі ісікпен күрес қоры (Cancerfonden), Capio медициналық желісі және Filmstaden кинотеатрлар желісі жұмылдырылған.
Кей өңірлерде 2000–2001 жылдар аралығында туған әйелдер де HPV-ге қарсы тегін екпе ала алады.
Айта кетейік, осыған дейін Швецияда жоғары жұмыссыздық деңгейі тіркелген болатын.
Кілтсөздер: Швеция, жатыр мойны обыры, HPV вакцинация, қатерлі ісік, адам папилломасы вирусы, тегін вакцина, әйелдер денсаулығы.
Фото: inform.kz сайтынан алынды