Бұл туралы EurasiaPluse ақпарат агенттігі хабарлады.
Starbase қаласы ресми түрде Техастағы жаңа қала мәртебесіне ие болады
Техас штатында, Мексикамен шекараға жақын орналасқан SpaceX-тің әйгілі Starbase аймағы енді ресми түрде қала болмақ. Сенбіге қараған түні өткен дауыс беру нәтижесінде 212 адам бұл шешімді қолдап, алты адам қарсы дауыс берген. Ал қала мәртебесін беру үшін 143 дауыс жеткілікті еді.
SpaceX бас директоры Илон Маск X әлеуметтік желісінде дауыс беру қорытындысын жариялап, «Техастағы Starbase енді нағыз қала болады!» деп ерекше атап өтті.
Енді округтік комиссиялар екі апта ішінде дауыс беру нәтижелерін талдап, судья жаңа қаланың ресми мәртебесін жариялайтын болады.
Starbase қаласы шамамен 1,5 шаршы миль аумақта орналасқан. Мұнда SpaceX-тің штаб-пәтері мен зауыттары бар. Компания зымыран қозғалтқыштары мен күшейткіштерін осы жерде құрастырып, сынақ ұшуларын жүргізеді.
Айта кетейік, бұған дейін SpaceX АҚШ-тың барлау қызметіне арналған спутниктерді ғарышқа ұшырғаны туралы хабарланған еді.
Кілтсөздер: SpaceX, Starbase, Илон Маск, Техас, қала мәртебесі, зымыран, ғарыш технологиясы
Фото: inform.kz сайтынан алынды