Бұл туралы EurasiaPluse ақпарат агенттігі хабарлады.
Тасманияда әлемдегі ең үлкен электрлі кеме суға түсірілді
Тасманияда орналасқан Incat зауытында суға жіберілген жаңа China Zorrilla кемесі – қазіргі таңда әлемдегі ең ірі электрлі кеме саналады. Алғашында бұл жоба сұйытылған табиғи газға негізделмек болғанымен, кейін толықтай электр энергиясына көшу туралы шешім қабылданды. Нәтижесінде кеме бортында 250 тоннадан астам аккумулятор орнатылып, энергия сақтау жүйесінің сыйымдылығы 40 мегаватт сағатқа жетті. Бұл – теңіз көлігіндегі ұқсас жүйелерге қарағанда төрт есе жоғары көрсеткіш.
China Zorrilla кемесі Аргентина астанасы Буэнос-Айрес пен Уругвайдағы Колония қаласы арасында жолаушы тасымалымен айналысады. Заманауи электрлі кеме 2100 жолаушы мен 225 автокөлікке дейін сыйдыра алады. Бұл – толықтай аккумуляторлық технологиямен жұмыс істейтін, теңіз көлігі тарихындағы тұңғыш аса ірі жоба.
Кеменің интерьерін әрлеу жұмыстары алдағы уақытта жалғасып, соңғы сынақтар 2025 жылдың соңына жоспарланып отыр.
Халықаралық энергетикалық агенттіктің мәліметінше, 2022 жылы теңіз көлігінің үлесі жаһандық көмірқышқыл газы шығарындыларының шамамен 2 пайызын құрады. Жүк және жолаушылар тасымалы нарығының артуына байланысты, таза энергия көздеріне көшу – климаттың өзгеруімен күрестегі басты бағыттардың бірі.
Сондай-ақ, жуырда Халықаралық теңіз ұйымы (IMO) көміртегі бейтараптығына қол жеткізу үшін жаңа талаптар қабылдады. Енді кемелер үшін отынға қойылатын стандарттар күшейтіліп, көмірқышқыл газының нормадан асқан шығарындылары үшін төлем енгізілмек.
Сарапшылар электрлі кемелердің экологияға зиянды шығарындыларды айтарлықтай азайтатынын атап өтті. Бұл – теңіз көлігі мен жасыл энергетика саласындағы маңызды қадам.
Кілтсөздер: электрлі кеме, теңіз көлігі, жасыл энергетика, көмірқышқыл газы, аккумулятор, климаттың өзгеруі, Тасмания, China Zorrilla
Фото: inform.kz сайтынан алынды